OKMK tomonidan mahalliy ishlab chiqaruvchilarni qo‘llab-quvvatlash maqsadida sanoat yarmarkasi tashkil etildi
Joriy yilning 11—12-oktabr kunlari Toshkent viloyati hokimligi va Olmaliq kon-metallurgiya kombinati hamkorligida Olmaliq shahridagi OKMK sport majmuasida Tarmoqlararo sanoat yarmarkasi tashkil etildi. Yarmarka doirasida ilm fan va innovatsion texnologiyalar mahsulotlari ko‘rgazmasi ham namoyish qilindi.
Tadbirda jami 300dan ziyod mahalliy ishlab chiqaruvchilar, ulardan 62tasi o‘zlashtirilgan 1000dan ortiq o‘z mahsulotlarini aks ettiruvchi stendlari bilan ishtirok etishdi.
Shuningdek, kombinat tomonidan import qilinadigan 2500 dan ortiq mahsulotlar ko‘rgazmasi ham namoyish etildi.
Yarmarka davomida B2B formatida uchrashuvlar tashkil etilib, unda OKMK texnik talablariga javob bera oladigan mahalliylashtirilgan mahsulotlarni o‘zlashtirish bilan bog‘liq masalalar muhokama etildi va 2026-yilgacha mahalliylashtirish dasturi doirasida innovatsion loyihalar, ilmiy sohadagi ixtirolar, o‘zlashtirilgan mahsulotlar va mahalliylashtirilgan mahsulotlarning yangi turlarini chiqarish bo‘yicha taqdimotlar o‘tkazildi.
Ta’kidlab o‘tish lozimki, yarmarkada OKMK tomonidan mahalliy ishlab chiqaruvchilar bilan 326 turdagi mahsulotlarni o‘zlashtirish bo‘yicha 961,7 mlrd so‘mlik memorandumlar imzolandi.
Kombinat vakillari tomonidan taqdim etilgan ma’lumotlarga ko‘ra, o‘tgan 2021-yil davomida mahalliylashtirish Dasturiga asosan 87 ta loyiha doirasida 217,2 mlrd so‘mlik mahsulot ishlab chiqarilib, reja 134,6 foizga bajarilgan.
Joriy yilning yanvar—sentabr oylarida mahalliylashtirish Dasturi doirasida 222,7 mlrd.so‘mlik mahsulot ishlab chiqarilib, reja esa 130 foizga bajarildi va o‘tgan yilning mos davriga nisbatan 149,7 foizni tashkil etdi.
9 oyda mahalliylashtirish Dasturiga qo‘shimcha ravishda joriy yilda 11 ta yangi loyihalarning tarmoq jadvali tasdiqlanib ishlab chiqarish boshlandi. Jumladan,“Qattiq qotishmali mahsulotlar - parma va keskichlar”, “Tosh maydalash tegirmoni qoplamasi”, “Yuqori haroratga chidamli keramik mahsulotlar”, “Volfram angidridi”, “Yanchish uskunasining zirhlari”, “Quyma mahsulotlar” va boshqalar.
Joriy yil yakunigacha mahalliylashtirish Dasturi doirasida 320,0 mlrd.so‘mlik mahsulot ishlab chiqarish ta’minlanadi,bu o‘tgan yilning mos davriga nisbatan 147,3 foizni tashkil etadi.
Mahalliy ishlab chiqaruvchilarni qo‘llab-quvvatlash, sanoat kooperatsiyasini aloqalarini rivojlantirish doirasida hamda import hajmini qisqartirish maqsadida jami 1,1 trln so‘mlik mahsulotlarni xarid etish bo‘yicha shartnomalar tuzilgan, shundan kooperatsiya portali orqali jami 727,3 mlrd so‘mlik shartnomalar imzolandi.
Import mahsulotlari hajmini maqbullashtirish bo‘yicha tarmoqlararo sanoat kooperatsiyasi aloqalarini kengaytirish natijasida hisobot davrida 65,2 mln dollarga import hajmlari qisqartirildi. Yil yakuniga qadar esa 88,1 mln dollarga qisqartirilishi kutilmoqda, — deb ma’lumot berdi OKMK Mahalliylashtirish bo‘limi boshlig‘i Dilshodbek Xoldaraliyev.
OKMK ilm-fanni ishlab chiqarishga integratsiyasiga ham alohida e’tibor qaratmoqda. Ushbu yo‘nalishda amalga oshirilgan harkatlar natijasida bir qator yangi turdagi mahsulotlar ishlab chiqarilishiga erishildi. Jumladan, 2019-yilda palladiy, 2021-yilda reniy, 2022-yilda molibden metalli sof holda olindi. 2022-yilning iyul oyida esa platina metallini ishlab chiqarish texnologiyasi uchun mualliflik huquqi qo‘lga kiritildi. Bugungi kunda OKMK 7 ta mahsulot ishlab chiqarish texnologiyasiga oid mualliflik huquqini qo‘lga kiritgan.
Bundan tashqari, 2022—2026-yillar mobaynida 6ta 6500,0 mln so‘mlik “drayver” innovatsion loyihalarni amalga oshirish belgilangan. Shuningdek, qarorda 2022-2023-yillar mobaynida respublikamizning tadqiqot institutlari tomonidan amalga oshiriladigan 9 459,4 mln so‘mlik innovatsion tadqiqot ishlarini boshqa korxonalar bilan birgalikda moliyalashtirish ishlari ko‘zda tutilgan. Hozirda 3 919,4 mln so‘mlik 9 ta ilmiy-tadqiqot ishlari moliyalashtirilgan.
Ma’lumotlar sheriklik huquqi asosida tayyorlandi
