“Muqaddas zaminda tinchlik bo‘lishi uchun duodaman” — Alla Pugachyova Rossiyadan chiqib ketganini tasdiqladi

Alla Pugachyova Rossiyani tark etib, Isroilga ketgan. Bu haqda uning o‘zi Instagram’da ma’lum qildi.

Xonanda o‘z muxlislariga “sevgi va qo‘llab-quvvatlashlari, haqiqatni yolg‘ondan ajrata olishayotgani uchun” minnatdorlik bildirdi.

“Sizlar uchun va Muqaddas zaminda tinchlik bo‘lishi uchun duodaman”, — deb yozgan Pugachyova.

OAV 29-sentabr kuni Pugachyova Vnukovo aeroportidan Isroilga uchib ketgani haqida yozgan edi. O‘shanda xonanda va uning vakillari bu ma’lumotni tasdiqlamadi.

Urush boshlanganidan ko‘p o‘tmay Rossiyani tark etgan Pugachyova avgust oyida mamlakatga qaytgan. O‘shanda u boshqa mamlakatga ko‘chish niyatida emasligini va farzandlari Rossiyadagi maktabga borishini aytgandi.

Sentabr oyi o‘rtalarida Rossiya hukumati Pugachyovaning turmush o‘rtog‘i, ko‘p marotaba urushga qarshi chiqqan Maksim Galkinni “xorijiy agent” deb e’lon qildi. Shundan so‘ng, xonanda o‘zini ham chet el agenti deb e’lon qilishlarini ochiqchasiga so‘radi.