AQSH Kongressi a’zolari OPEK+ (Neft eksport qiluvchi davlatlar tashkiloti) mamlakatlarining neft qazib olishni qisqartirish haqidagi qarori fonida Saudiya Arabistoniga qurol sotishni to‘xtatishni taklif qilmoqda.
“Milliy xavfsizlikni yaxshilash yo‘lidagi oddiyroq va tezroq qadam AQSHning Saudiya Arabistoniga barcha harbiy ta’minoti, savdosi va boshqa harbiy yordamini to‘xtatib qo‘yish bo‘lardi”, — deydi Kongressning Vakillar palatasi a’zosi Ro Xanna va senator Richard Blyumental Politico maqolasida.
Kongress a’zolariga ko‘ra, Ar-Riyod AQSH harbiy ta’minoti va mudofaa yordamiga qattiq bog‘langan. Kongressmenlarning fikricha, Saudiya Arabistoni hozirda qurol yetkazib beruvchilarni almashtira olmaydi, chunki mamlakat balansidagi Amerika qurollari boshqa davlatlar qurollariga mos kelmaydi.
“Saudiya Arabistonining hozirgi qurol tizimi va boshqa potensial xorijiy ta’minotchilar o‘rtasidagi minimal muvofiqlikni hisobga olsak, bu mamlakat taklif qilingan qonun loyihasiga javob berish uchun AQSH bilan muzokaralar stoliga yaxshi niyatda qaytishdan boshqa narsa qila olmaydi”, — dedi qonunchilar.
Ro Xanna va Richard Blyumental neft qazib olishni qisqartirish to‘g‘risidagi qaror Rossiya bilan “til biriktirish”dan so‘ng qabul qilingan deb hisoblamoqda.
5-sentabr kuni OPEK+ davlatlari neft qazib olishni noyabr oyidan boshlab kuniga 2 million barrelga qisqartirishga kelishib oldi. AQSH prezidenti Jo Bayden, o‘z navbatida, neft qazib olish kvotalari qisqartirish qaroridan hafsalasi pir bo‘lganini bildirdi va AQSH ehtimoliy javob choralarini o‘rganayotgani haqida ogohlantirdi.
Keyinroq AQSH Davlat kotibi Entoni Blinken Vashington OPEK mamlakatlari qaroriga javob berishning turli variantlarini, jumladan Saudiya Arabistoni bilan munosabatlarni ham ko‘rib chiqayotganini aytdi.
Izoh (0)