Farg‘onada ustiga somon ortilgan “Moskvich” va uning tirkamasi yonib ketdi. Bu haqda “Daryo”ga viloyat Favqulodda vaziyatlar boshqarmasi xabar berdi.
Boshqarma axborot xizmatining ma’lum qilishicha, 29-sentabr kuni soat 13:48 da Buvayda tumani Yangiqo‘rg‘on qishlog‘ida joylashgan somon bozorida to‘xtab turgan “Moskvich” va unga ulangan tirkama ustiga ortilgan 300 dona somoni bilan yonayotgani haqida xabar kelib tushgan.
O‘t o‘chiruvchilar voqea joyiga 14:00 da yetib borgan, 14:02 da o‘rab olinib, 14:10 da yong‘in o‘chirilgan. Yong‘in natijasida avtomashina egasi A.A. ikki qo‘l kaftlari hamda yuz qismidan turli darajada kuyish tan jarohati olgan.
Hozirda tegishli tashkilotlar tomonidan yong‘inning kelib chiqish sababi va yetkazilgan zarar miqdori aniqlanmoqda.