Rossiya bosh prokuraturasi Sankt-Peterburg sudiga da’vo arizasi kiritib, Leningrad qamalini “harbiy jinoyat va insoniyatga qarshi jinoyat, sovet xalqiga nisbatan genotsid” deb tan olishni talab qildi, deb yozadi “RBK”.
Idora xabarida aytilishicha, shahar prokuratura organlari tomonidan “huquq-tartibot organlari, shuningdek, soha mutaxassislari bilan hamkorlik ta’minlangan. Ulug‘ Vatan urushi yillarida Leningrad aholisining ommaviy qirg‘in qilinishi holatlari bo‘yicha arxiv hujjatlar va materiallar o‘rganib chiqilgan”.
Bosh prokuratura ma’lum qilishicha, Leningrad qamal qilinishi chog‘ida shahar aholisi, infratuzilma obyektlari, shu jumladan, hayotni ta’minlash obyektlari muntazam o‘qqa tutilgan va bombardimon qilingan, ocharchilik yuzaga kelishi uchun sharoitlar yaratilgan.
Shu bilan birga, idorada qayd etishlaricha, Nyurnberg jarayoni chog‘ida Leningrad qamal qilinishi orqali uning aholisining yo‘q qilinishi, shu jumladan, shaharda ocharchilik yuzaga kelishi uchun sharoitlar yaratilishiga huquqiy baho berilmagan.
“Ushbu ariza Rossiya Federatsiyasi milliy manfaatlarini, noaniq doiradagi shaxslar — qamalga olingan Leningrad aholisi, shahar hududida halok bo‘lgan tinch fuqarolarning qarindoshlari va avlodlari qonuniy huquq va manfaatlarini himoya qilish, shuningdek, dunyo jamoatchiligiga Ulug‘ Vatan urushi yillaridagi istilochilar qurbonlari haqidagi ma’lumotni yetkazish maqsadlarida Sankt_peterburg shahar sudiga kiritilfi”, — deyiladi xabarda.
Leningrad qamali mavzusi 1946-yilda Nyurnberg jarayonida ko‘tarilgan edi. SSSR vakillari 900 kun davomida shaharga 100 mingdan ortiq bomba tashlangani, 150 mingtadan ortiq artilleriya snaryadlari otilganini ma’lum qilgan. Butun qamal davomida 670 mingdan ortiq odam halok bo‘lgan. Ammo shaharda ocharchilik uyushtirilgani genotsid deb tan olinmagan, chunki bunday usulda urush olib borishga taqiq Jeneva konvensiyasiga keyinroq kiritilgandi.
Izoh (0)