Navoiyda 15 sotix yerni 90 million so‘mga sotmoqchi bo‘lgan shaxs ushlandi

Navoiy viloyati Karmana tumanida 15 sotix yer maydonini sotmoqchi bo‘lgan shaxslar va ularning sherigi ushlandi. Bu haqda Iqtisodiy jinoyatlarga qarshi kurashish departamenti xabar berdi.

Bosh prokuratura huzuridagi departament hamda IIVning Navoiy viloyati boshqarmalari tomonidan tezkor tadbir o‘tkazilgan. Unda fuqarolar S.B. va S.X. fuqaro B.ga Karmana tumani “Nurafshon” MFY hududidan 15 sotix bo‘sh yer maydonini kadastr bo‘limida ishlovchi “A.” ismli tanishi orqali rasmiylashtirib berish orqali 90 million so‘mga sotishga kelishib, evaziga 8300 dollarni olgan vaqtida ushlangan.

S.X.ning ko‘rsatuviga asosan davom etgan tadbirda Davlat kadastrlar palatasi Karmana tumani filiali kadastr muhandisi vazifasida ishlovchi A.E. o‘z xizmat xonasida 900 ming so‘mni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.