“Masjidlarni obod qilayotganimiz kabi faqir va yetim-yesirlar ko‘nglini ham obod qilaylik” — Nuriddin domla Xoliqnazarov
O‘zbekiston musulmonlari idorasi raisi, muftiy Nuriddin domla Xoliqnazarov ma’ruzalardan birida musulmonlarni masjidlarga qilinayotgan ehsonlari barobarida, yetim-yesir, beva-bechoralarga ham yordam berishga chaqirdi.
Siz bir masjidni bino qilishga hissa qo‘shdingizmi, bitta kambag‘alni ham ko‘nglini ko‘tarib qo‘ying, bitta yetimni ham boshini silang. Ertaga dorisiga pul topolmayapman, yegani go‘shti yo‘q bir go‘dak kelib, bu naqshlarga qarab, bu pulga man onamga qancha dori olishim mumkin edi, demasin. Kambag‘al, faqir bu yerdan o‘tib ketayotib, har yili qishda uyining tomidan chakki o‘tib turarkan, mana shu tomning bir parchasi meni uyimda bo‘lsa edi, deb orzu qilmasin.Endi bu qavm shunday bino qilganlar, albatta, shu atrofda yetim-yesir, beva-bechoralarning holidan xabar oling. Ana o‘shanda masjidimiz yarashadi, ana o‘shanda bu narsalar chiroyli bo‘ladi.
Lekin hammamiz faqatgina bor mablag‘imizni shunga sarflab, shuni bino qilsak, shu savob bo‘ladi, desak, ammo bu yerda bitta yetim qiynalayotgan bo‘lsa, buni savobini ololmay qolamiz.
Keyingi paytda masjidlar naqshinkor, minoralar baland bo‘lgan bilan yetim, kambag‘al, xonadonlarda qiyinchilik bo‘layotgan bo‘lsa, doriga pul topolmayotgan bo‘lsa, farzandini o‘qitishga pul topolmayotgan bo‘lsa shu narsa biz uchun og‘ir musibat bo‘lib qolmasin”, – deydi Nuriddin domla Xoliqnazarov.
