Oston O‘runovga Rossiyaning yana bir jamoasi xaridor
“Spartak”ning o‘zbekistonlik futbolchisi Oston O‘runov faoliyatini “Torpedo”da davom ettirishi mumkin, deya xabar beradi “Sport-Ekspress” nashri.
Avvalroq O‘runovga “Ximki” klubi qiziqish bildirayotgani, futbolchini ijaraga yoki erkin agent sifatida o‘z safiga qo‘shib olmoqchiligi ma’lum qilingandi. Endi “Torpedo” ham futbolchini ijaraga olish variantini ko‘rib chiqmoqda.
Ostonning to‘g‘ridan to‘g‘ri transferiga uning yuqori maoshi to‘siq bo‘ladi. O‘runov yiliga 600 ming yevro maosh oladi. RPLning birorta jamoasi o‘zbekistonlik futbolchining shartnomasini to‘liq zimmasiga olishga tayyor emas.
O‘runov o‘tgan mavsum “Ufa”da ijara asosida o‘ynadi va 17 ta o‘yinda maydonga tushdi.
O‘zbekistonlik futbolchi 2020-yil fevral oyida “Ufa” bilan shartnoma imzolagan. Mavsum so‘ngida esa “Spartak”ning o‘sha vaqtlardagi bosh direktori Shamil Gazizov O‘runovni Moskva klubiga olib kelgan (aynan Gazizov futbolchini “Ufa”ga ham taklif qilgandi). 2020-yil dekabr oyida Gazizov o‘z lavozimini tark etdi va “Ufa”ga qaytib bordi. Shundan so‘ng ufaliklar Ostonni 2020/21-yilgi mavsum so‘ngiga qadar ijaraga oldi. O‘runovning ijara muddati 2021/22-yilga qadar uzaytirilgandi.
