Остон Ўруновга Россиянинг яна бир жамоаси харидор

«Спартак»нинг ўзбекистонлик футболчиси Остон Ўрунов фаолиятини «Торпедо»да давом эттириши мумкин, дея хабар беради «Спорт-Экспресс» нашри.

Аввалроқ Ўруновга «Химки» клуби қизиқиш билдираётгани, футболчини ижарага ёки эркин агент сифатида ўз сафига қўшиб олмоқчилиги маълум қилинганди. Энди «Торпедо» ҳам футболчини ижарага олиш вариантини кўриб чиқмоқда.

Остоннинг тўғридан-тўғри трансферига унинг юқори маоши тўсиқ бўлади. Ўрунов йилига 600 минг евро маош олади. РПЛнинг бирорта жамоаси ўзбекистонлик футболчининг шартномасини тўлиқ зиммасига олишга тайёр эмас.

Ўрунов ўтган мавсум «Уфа»да ижара асосида ўйнади ва 17 та ўйинда майдонга тушди.

Ўзбекистонлик футболчи 2020 йил февраль ойида «Уфа» билан шартнома имзолаган. Мавсум сўнгида эса «Спартак»нинг ўша вақтлардаги бош директори Шамил Газизов Ўруновни Москва клубига олиб келган (айнан Газизов футболчини «Уфа»га ҳам таклиф қилганди). 2020 йил декабрь ойида Газизов ўз лавозимини тарк этди ва «Уфа»га қайтиб борди. Шундан сўнг уфаликлар Остонни 2020/21 йилги мавсум сўнгига қадар ижарага олди. Ўруновнинг ижара муддати 2021/22 йилга қадар узайтирилганди.