Abdulaziz Komilovga yana bir vazifa yuklandi
Prezident huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari Abdulaziz Komilovga yana bitta vazifa yuklandi. Bu haqda prezident matbuot kotibi Sherzod Asadov ma’lum qildi.
Ma’lum qilinishicha, O‘zbekiston prezidentining tegishli farmoni bilan Prezident huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari Abdulaziz Komilov O‘zbekiston prezidentining tashqi siyosat masalalari bo‘yicha maxsus vakili lavozimiga tayinlangan. Komilov Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari sifatida ham o‘z ishini davom ettiradi.
Eslatib o‘tamiz, 29-mart kuni Tashqi ishlar vazirligi matbuot xizmati Abdulaziz Komilov davolanish uchun xorijga jo‘nab ketganini ma’lum qilgandi. Xabarda vazir bungacha 10 kun davomida Tibbiyot bosh boshqarmasining 1-son Markaziy klinik shifoxonasida tibbiy muolajalar olgani aytilgan.
27-aprel kuni O‘zbekiston prezidentining tegishli farmonlari bilan O‘zbekiston tashqi ishlar vaziri lavozimini egallab kelgan Abdulaziz Komilov O‘zbekiston prezidenti huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari lavozimiga, tashqi ishlar vazirining birinchi o‘rinbosari Vladimir Norov esa TIV rahbari vazifasini bajaruvchi etib tayinlangan edi.
