Ijtimoiy tarmoqlarda to‘y kuni o‘yinda yutqazib qo‘ygan kuyov kelinni urgani aks etgan videolavha tarqalgandi. Keyinroq mazkur to‘y marosimi Surxondaryoda bo‘lgani va kelinni urgan kuyov javobgarlikka tortilgani to‘g‘risida ma’lum bo‘ldi. Ushbu holat yuzasidan Oliy Majlis Senati Xotin qizlar va gender tenglik masalalari qo‘mitasi tomonidan o‘rganishlar olib borildi, deb xabar beradi O‘zA.
Aniqlanishicha, ushbu to‘y 2022-yil 6-iyunda Surxondaryo viloyati Uzun tumanidagi “Toltugay” mahallasida bo‘lib o‘tgan. Voqea yuz berganidan keyin mahalladagi otaxon va onaxonlar, kelin-kuyovning yaqinlari ishtirokida voqea muhokama etilib, kuyovning qilmishi noto‘g‘ri bo‘lgani tanqid qilingan. Yigit qilmishidan pushaymon ekanini aytib, kelindan kechirim so‘ragan. Shu kunning o‘zida kelin-kuyov yarashib ketgan, hozirgi paytda ular birga istiqomat qilmoqda.
Bu kabi salbiy holatlarning oldini olish maqsadida Senatda xotin-qizlar va bolalarning huquqlari, erkinliklari hamda qonuniy manfaatlarini ishonchli himoya qilishga qaratilgan qonunchilikni takomillashtirish masalalari yuzasidan ishchi guruh tuzilgan.
Senat a’zolari, Vazirlar Mahkamasi, sud va huquqni muhofaza qiluvchi organlar, tegishli vazirlik va idoralar, nodavlat notijorat tashkilotlari hamda ommaviy axborot vositalari vakillaridan iborat ushbu ishchi guruh tomonidan xotin-qizlar va voyaga yetmaganlarga nisbatan sodir etilayotgan nojo‘ya harakatlarning kelib chiqish sabablari, ularning oldini olish bo‘yicha qonunchilikni takomillashtirishga oid masalalar muhokama etib boriladi.
Ayni kunlarda ishchi guruh tomonidan sohaga oid qonunchilik hujjatlarini takomillashtirish, shu jumladan, jazo choralarini kuchaytirish yuzasidan qonun loyihasini ishlab chiqish bo‘yicha keng jamoatchilik, fuqarolik jamiyati institutlari vakillarini, olimlar va mutaxassislar, yoshlar fikrlari o‘rganilib, takliflar yig‘ilmoqda.
Oliy Majlis Senati Xotin qizlar va gender tenglik masalalari qo‘mitasi ayollarga, qizlarga bo‘layotgan bunday zo‘ravonlik holatlarini keskin qoralaydi hamda yoshlarni oilaviy hayotga tayyorlashda noxush holatlarga yo‘l qo‘ymaslik, zo‘ravonlik qilayotgan shaxslarga keskin choralar ko‘rish bo‘yicha ish olib borishni maqsad qilib qo‘ygan.
Izoh (0)