O‘zbekistonga may oyida 1,6 mlrd dollar pul o‘tkazildi. Bu yangi rekord
Markaziy bank jismoniy shaxslarning valyuta operatsiyalariga doir ma’lumotlarni taqdim etdi.
2022-yil yanvar—may oylarida O‘zbekistonga kelib tushgan xalqaro pul o‘tkazmalari 4,19 mlrd dollarni tashkil etib, 2021-yilning mos davriga nisbatan 61 foizga (1,58 mlrd dollar) oshdi. O‘tgan yilning dastlabki 5 oyida 1,58 mlrd dollar pul o‘tkazmalari amalga oshirilgan edi.
Aprel oyida 1 mlrd dollarlik pul o‘tkazmalari bilan rekord qayd etilgan edi. May oyida bu ko‘rsatkich 1,6 mlrd dollarga yetdi.
O‘zbekistondagi pul o‘tkazmalari nimalarga ta’sir ko‘rsatadi?
Rossiyadan amalga oshiriladigan pul o‘tkazmalarining Markaziy Osiyo davlatlari uchun ahamiyati juda katta – ular mahalliy aholini ta’minlaydi va mamlakat iqtisodiyotini qo‘llab-quvvatlaydi.
Pul o‘tkazmalari hattoki xorijda ishlaydigan hech kimi yo‘qlarga ham o‘z ta’sirini ko‘rsatadi.
- Birinchidan, pul o‘tkazmalari tashqi savdodagi salbiy saldoni qisman qoplaydi – O‘zbekiston deyarli doimo sotishdan ko‘ra ko‘proq xarid qiladi. Ikkilamchi daromadlarning ijobiy saldosi yilning birinchi choragida 1 mlrd dollarni tashkil etib, o‘tgan yilga nisbatan 11 foiz yoki 121 mln dollarga kamroq bo‘ldi. Bu esa chetdan kirib kelayotgan pul o‘tkazmalari soni dastlabki uch oyda kamaygani bilan bog‘liq.
- Ikkinchidan, o‘tkazmalar so‘m kursini qo‘llab-quvvatlaydi. Ular tufayli may oyida so‘m bor-yo‘g‘i 1,8 foizga qadrsizlangan — bu so‘nggi yillar ichidagi eng yaxshi ko‘rsatkichlardan biri. O‘zbekistonga amalga oshiriladigan pul mablag‘lari qanchalik ko‘p bo‘lsa, bozordagi chet el valyutasi taklifi ham shunchalik yuqori bo‘ladi. O‘tgan yilda mazkur taklif 1,6 martaga o‘sgan edi.
Shunday qilib, migrantlarning pul o‘tkazmalari aholining to‘lovlarni amalga oshirish imkoniyatini, tovar va xizmatlarga bo‘lgan talabni, iqtisodiy o‘sishni bevosita ta’minlaydi.
