G‘amxo‘rlik — milliy qadriyatimiz
G‘amxo‘rlik so‘zi har birimizning qalbimizdan chuqur o‘rin egallagan va va kunlik hayotida o‘zi sezmagan holda tez-tez bajarib turadigan ezgu amallaridan biri hisoblanadi. Har birimiz oilamiz, mahalladoshlarimiz, tanish-bilishlarga va umuman bizga yetti yot begona bo‘lganlarga ham g‘amxo‘rlik qilamiz, ularga yordamimizni ayamaymiz.
Bu xislat ota-bobolarimizdan qolgan milliy qadriyat, ya’ni bebaho meros. Qudratli sarkarda Amir Temur tuzgan qudratli davlatni shu darajada yuksalishi negizida g‘amxo‘rlik yotadi. Masalan, Amir Temur har bir fuqaroning yonida yashovchi qo‘shnisiga g‘amxo‘r bo‘lishini istagan. U, basharti qo‘shnisi qiynalib, uylarini ta’mirlay olmasa yoki moddiy jihatdan qiynalib qolsa, imkoni boricha bir bo‘lak nonini ham qo‘shnisi bilan baham ko‘rishni maslahat bergan.
Bu kabi qadriyatlarimiz davlat siyosati darajasida bo‘lib, biz barpo etayotgan xalqparvar va adolatli davlatning asosiy xususiyat́iga aylanmoqda. Shu maqsadda 2022-yilga “Inson qadrini ulug‘lash va faol mahalla yili” deb nom berildi. Shu maqsadda har bir hudud kesimida kambag‘allikni qisqartirish, tadbirkorlikni rivojlantirish, ish o‘rinlarini yaratish, aholi daromadini oshirish bo‘yicha alohida-alohida dasturlar qabul qilinmoqda.
Eng muhimi, fuqarolarimiz va farzandlarimizga g‘amxo‘rlik ko‘rsatish bo‘yicha yangi tizim yaratildi. Bugun “temir daftar”, “yoshlar” va “ayollar” daftarlari, “Saxovat va ko‘mak” jamg‘armasi orqali 200 mingdan ziyod ehtiyojmand aholiga ko‘mak berildi.
“Mehribonlik uylari”dagi 1,5 mingga yaqin o‘g‘il-qizlarimiz oilalarga olindi, 116 ta oilaviy uylar tashkil qilinib, 700 ga yaqin farzandlarimiz ota-ona bag‘rida voyaga yetishi uchun sharoit yaratildi. Buning hisobiga, 10 ta “Mehribonlik uyi”, 4 ta “Bolalar shaharchasi” va 2 ta “Bolalar uylari” yopildi. Bunday amallardan faxrlansak arziydi. E’tibor bering, 35 mingga yaqin parvarishga muhtoj bolalarning onalariga 500 ming so‘m nafaqa to‘lash joriy etildi. Bunday tizim bizda ilgari bo‘lmagan.
Shuningdek, ishga qabul qilingan bolalikdan nogiron hamda birinchi va ikkinchi guruh nogironligi bo‘lgan shaxslar oyligining 2,5 million so‘mgacha qismi daromad solig‘idan ozod qilindi. Buning natijasida har oyda nogironligi bo‘lgan ishlovchi shaxslar ixtiyorida o‘rtacha 160 ming so‘mdan qo‘shimcha mablag‘ qolmoqda. Ish beruvchilarga ular tomonidan nogironligi bo‘lgan shaxslar uchun to‘langan ijtimoiy soliq summasi budjetdan to‘liq qaytarib berilmoqda.
Bugungi ijtimoiy siyosatdagi tub o‘zgarish va jarayonlarni haybatli mevali daraxtga o‘xshatish mumkin. Uning ulug‘vorligi u o‘sib voyaga yetgan unumdor zaminga bog‘liqdir. O‘zgalarga soya berar, o‘zi esa oftobda turar, va u, o‘zi uchun emas, boshqalarning huzur-halovati uchun meva berar ekan. Bunday daraxtning umri chinordek uzoq bo‘lishi haqiqatdir.
Usarova F.X. O‘zR Fanlar akademiyasi huzuridagi O‘zbekistonning eng yangi tarixi masalalari bo‘yicha Muvofiqlashtiruvchi-metodik markaz direktori v.b., siyosiy fanlar nomzodi, dotsent
