“Barselona” himoyachisi Pike va Ispaniya futbol federatsiyasi prezidenti korrupsiyada ayblanmoqda

“Barselona” himoyachisi Xerard Pike va Ispaniya futbol federatsiyasi (RFEF) prezidenti Luis Rubiales korrupsion kelishuvda ishtirok etgan bo‘lishi mumkin. Bu haqida El Confidencial nashri xabar bermoqda.

Pike va Rubiales til biriktirib, Ispaniya Superkubogi mezbonligini taqdim etadigan shartnoma uchun Saudiya Arabistoni rasmiylaridan qo‘shimcha 24 million yevro undirgan. Bu Xerardga tegishli Kosmos kompaniyasi orqali amalga oshirilgan.

Qayd etilishicha, RFEF Kosmos kompaniyasi bilan birgalikda Ispaniya Superkubogini Saudiya Arabistoni o‘tkazish borasida kelishuvda erishgan.

Kosmos RFEF va Saudiya Arabistoni vakillari o‘rtasida vositachilik qilgan. Bu kelishuvga ko‘ra, Pikening kompaniyasi har bir o‘tkaziladigan Superkubok musobaqasidan 4 million yevro daromad qiladi (oltita musobaqa uchun umumiy 24 million yevro). Saudiyaliklar bu pulni to‘lab berish majburiyatini o‘z bo‘yniga olgan, agar pullar vaqtida o‘tkazilmasa kelishuv bekor bo‘ladi.

Ispaniya Superkubogini Saudiyada o‘tkazish bo‘yicha bitim 2019-yilda imzolangan. RFEF o‘sha vaqtda Kosmos kompaniyasining muzokaralarda ishtirok etganini tasdiqlagandi. Biroq Rubiales Pikening kompaniyasiga qandaydir to‘lov amalga oshirilganini inkor etgan.

El Confidencial bu ma’lumotlarning tasdig‘i sifatida Pike va Rubiales o‘rtasidagi suhbatning audioyozuvini ilova qilgan:

“Rubi, qara. Agar gap pullarda bo‘lsa, ‘Real’ 8 million yevroga (Saudiya Arabistonidagi Superkubokda ishtirok etish uchun) rozi bo‘ladi. ‘Real’ga 8 million, ‘Barselona’ga 8 million, qolganlarga 2 va 1 million bersang bo‘ladi. Federatsiya esa o‘ziga 6 million olib qoladi. Biz esa yana 1-2 million yevro uchun Saudiya Arabistoniga bosim o‘tkazishimiz mumkin”, — degan kataloniyaliklar himoyachisi.

Boshqa bir audioyozuvda esa Rubiales Pikeni shartnoma imzolangani bilan tabriklagani qayd etilgan.

Saudiya Arabistoni bilan kelishuvga ko‘ra, Ispaniya futbol federatsiyasi har yili 40 million yevro miqdorida kafolatlangan to‘lovlarni oladi. Undan tashqari Rubialesning maoshi ham bir necha barobar oshgan.