Yengilmas bokschi Errol Spens Yordenis Ugasni mag‘lub etib, uchta kamarni birlashtirdi

AQShning Arlington shahrida 17-aprel kechasi professional boks oqshomi bo‘lib o‘tdi.

Kechaning markaziy jangi yarim o‘rta vazn (-66,6 kg) toifasida IBF va WBC chempioni Errol Spens (28-0, 22 KO) va WBA kamari sohibi Yordenis Ugas (27-5, 12 KO) o‘rtasida kechdi. Errol 10-raunddagi texnik nokaut evaziga Yordenis Ugas ustidan g‘alaba qozondi.

Uzoq muddatli tanaffusdan so‘ng ringga qaytgan 32 yoshli Spens raqibidan faolroq harakat qildi va hujumda ko‘proq vaqt o‘tkazdi. 35 yoshli Ugas esa jangning birinchi yarmida qarshi hujumlarda muvaffaqiyatli ishtirok etdi. 8-raundda Ugasning deyarli yopilib qolgan o‘ng ko‘zini tekshirish uchun jang to‘xtatildi. Ammo shifokorlar jangni davom ettirish uchun ruxsat berdi. 10-raundda hakam kubalikning ko‘zi jarohatlangani sabab, yana jangni to‘xtatdi. Bu safar shifokorlarning tavsiyasiga ko‘ra jang to‘xtatildi va Spens texnik nokaut evaziga g‘alaba qozondi.

Shu tariqa Errol IBF va WBC kamarlari yoniga WBA titulini ham qo‘shib qo‘ydi. WBO kamariga Terens Krouford egalik qiladi.

Spens bundan avvalgi so‘nggi jangida 2020-yilning dekabrida Danni Garsiyani yengandi. Ugas esa oxirgi marta 2021-yilning avgustida Menni Pakyaoga qarshi jang qilib, uni mag‘lub etgandi.

Eslatib o‘tamiz, ushbu vazn toifasida (-66,6 kg) o‘zbekistonlik Qudratillo Abduqahhorov (18-1, 10 KO) ham faoliyat olib boradi.