Sirdaryoda ijtimoiy tarmoqlar orqali terroristik g‘oyalarni targ‘ib qilgan bir guruh shaxslar ushlandi, deb xabar bermoqda viloyat IIB matbuot xizmati.
Qayd etilishicha, DXX Sirdaryo viloyati bo‘yicha boshqarmasi va viloyat IIB xodimlari tomonidan olib borilgan tezkor tadbirda Suriyadagi “Katibatul Tavhid va Jihod” xalqaro terroristik tashkiloti a’zolari tomonidan ochilgan “virtual guruh”ga a’zo bo‘lib, undagi aqidaparastlik materiallarni boshqalarga tarqatib kelgan 7 kishi qo‘lga olingan.
Ushbu fuqarolar Suriyadagi jangarilar rahnamolarining onlayn darslarida ishtirok etib kelgan va ma’lum muddat ichida ulardan 2 nafari (2001-yilda tug‘ilgan M.O. va 2002-yilda tug‘ilgan M.M.) radikal g‘oyalar ta’siriga tushib, Suriyaga chiqib ketishga tayyorgarlik ko‘rgan.
Yashash joylarida o‘tkazilgan tintuv jarayonida qo‘lga olinganlardan jinoyatga aloqador ashyoviy dalillar rasmiylashtirib olingan.
Qayd etilishicha, to‘plangan materiallar asosida DXX Sirdaryo viloyati bo‘yicha boshqarmasi tergov bo‘limi tomonidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)