Navoiyda 2 ta yangi oltin koni ochildi

Navoiy viloyati Tomdi tumani hududida 2 ta yangi “Muruntov” koni tarkibida “Balpantog‘” va “Tomdibuloq” konlari ochildi. Bu haqda Navoiy kon-metallurgiya kombinati matbuot xizmati xabar berdi.

Qayd etilishicha, yangi konlarning oltin tarkibli ma’dan zaxiralari kombinatning 2-gidrometallurgiya zavodiga 33 kilometrlik temiryo‘llar orqali tashiladi. Konlar 40 million tonnadan ortiq ma’dan zaxirasiga ega.

Shuningdek, konlardan qariyb 15 yil mobaynida yiliga 3 million tonnadan oltinga boy ma’dan qazib olinadi. Bu ishlarni bajarish uchun konga 7 ta gidravlik ekskavator, 5 ta burg‘ilash qurilmasi, 23 ta avtoag‘dargich, 2 ta teplovoz va boshqa ko‘plab kon texnikalarini xarid qilish ko‘zda tutilgan.

Hozirgi kunda bitta zamonaviy gidravlik ekskavatori, 90 tonna yuk ko‘tarish quvvatiga ega 10 ta avtoag‘dargich keltirildi. Bugundan kon yuzasini ochish ishlari boshlandi.

Loyiha doirasida konda 653 ta yangi ish o‘rni yaratiladi.