The New York Times gazetasi Rossiya armiyasi chiqib ketganidan so‘ng ko‘chalaridan o‘nlab tinch aholi jasadi topilgan Bucha shahrining sun’iy yo‘ldoshdan olingan tasvirlarini e’lon qildi.
Jurnalistlar Maxar Technologies tomonidan mart oyi o‘rtalarida olingan suratlarni tahlil qilib, aholi uch haftadan ko‘proq vaqt oldin — shahar hali Rossiya harbiylari nazoratida bo‘lgan paytda o‘ldirilgan, degan xulosaga keldi.
9 dan 11-martgacha bo‘lgan vaqt oralig‘ida shaharning Yablonskaya ko‘chasidagi tasvirlarda inson tanasining o‘lchamidagi kamida 11 ta qora obyekt paydo bo‘lgan va u yerda uch hafta yotgan. Ularning joylashuvi 2-aprel kuni Ukraina harbiylari tomonidan olingan videodagi odamlarning jasadlari yotgan joylar bilan to‘liq mos tushdi.
Jurnalistlar Yablonskayadan olingan va uch kishining jasadi aks etgan yana bir videoni sun’iy yo‘ldosh tasvirlari bilan solishtirib, jasadlar ko‘chada 20—21-mart kunlari paydo bo‘lganini aniqladi.
Eslatib o‘tamiz, Kiyev viloyatidagi Bucha shahrida tinch aholining qirg‘in qilingani 2-aprel kuni, Rossiya harbiylari chiqib ketganidan keyin Ukraina armiyasi shahar ustidan nazorat o‘rnatgan paytda ma’lum bo‘ldi. Ukraina prezidenti mahalliy aholining o‘limida rossiyalik askarlarni aybladi. Rossiya Mudofaa vazirligi halok bo‘lganlarning video va suratlarini “provokatsiya” va “G‘arb ommaviy axborot vositalari uchun Kiyev rejimining tomoshasi” deb atadi. Vazirlik ma’lumotlariga ko‘ra, rus harbiylari 30-mart kuni shaharni tark etgunga qadar Bucha shahridagi birorta ham mahalliy aholi “hech qanday zo‘ravonlik harakatlaridan jabr ko‘rmagan”.
Izoh (0)