Qirg‘iziston prezidenti Sadir Japarov ijtimoiy soha xodimlari yig‘ilishida jahondagi voqealar sabab mamlakat iqtisodiyotidagi vaziyat yomonlashayotgani, hamma narsa qimmatlashib borayotganidan ogohlantirdi va vatandoshlarini o‘z xarajatlarini qayta ko‘rib chiqishga chaqirdi. Bu haqda prezident matbuot xizmatiga tayanib, “Interfaks” xabar berdi.
“Dunyoda yuz berayotgan so‘nggi voqealar tufayli vaziyat yomonlashishi mumkin. Biz bunga tayyor bo‘lishimiz kerak”, — dedi Japarov.
Uning so‘zlariga ko‘ra, mamlakatdagi vaziyat og‘ir. “Hamma narsa qimmat. Narxlar ko‘tarildi. Ishsizlik davom etmoqda. Ko‘plab zaruriy mahsulotlar yetishmayapti. Hammadan xarajatlarni qayta ko‘rib chiqishni, qimmatbaho narsalar xaridini kechiktirishni, to‘y va ziyofatlar o‘tkazmaslikni hamda pulni behuda sovurishdan tiyilishni so‘rayman”, — dedi Japarov.
Japarovning ta’kidlashicha, hozir eng muhimi — oziq-ovqat xavfsizligi. “Ham davlat darajasida, ham har bir oila darajasida. Birorta dalani ekinsiz qoldirmaylik, bahor kunlarida barchadan bog‘da mehnat qilib, ariqlarni tozalashni so‘rab qolaman. Kun yilni oziqlantiradi! Shunday ekan, davlat Qirg‘izistonning har bir fuqarosiga ijtimoiy yordam ko‘rsatish uchun bor kuchini ayamaydi”, — dedi Japarov.
U 1-apreldan boshlab mamlakatda 300 mingdan ortiq ijtimoiy soha xodimlarining ish haqi oshirilganini, 1-iyundan esa bolalar nafaqasini oshirish rejalashtirilayotganini eslatdi.
“Bugun ijtimoiy va madaniy soha xodimlarining oyliklarini oshirdik. G‘aznamiz to‘la bo‘lganida birdaniga barcha sohalar bo‘yicha maoshlarni oshirar edik. Budjetimiz cheklangan. Shuning uchun sabr-toqatli bo‘lishingizni so‘rayman”, — dedi prezident.
Izoh (0)