Ekoqo‘mita 1000 dollarga tirik bo‘ri sotilayotgani aytilgan xabarlarga munosabat bildirdi

Ijtimoiy tarmoqlarda tirik bo‘ri 1000 dollarga sotilayotgani to‘g‘risida xabar tarqaldi. Ekologiya va atrof-muhitni muhofaza qilish davlat qo‘mitasi holat yuzasidan o‘rganish ishlari olib borilayotganini ma’lum qildi.

Telegram’da tarqalgan xabarlarga ko‘ra, H.H. ismli fuqaro tabiatdan tutib olingan sog‘lom bo‘rini sotish bo‘yicha e’lon bergan.

Ma’lum qilinishicha, Davlat ekologiya qo‘mitasi tomonidan qonun hujjatlariga binoan yovvoyi hayvonlardan maxsus foydalanish uchun har yili kvota ajratiladi. Yovvoyi hayvonlar tabiatdan turli maqsadlarda ovlanadi (tutiladi).

Biroq yovvoyi hayvonlarni tabiatdan ovlash (tutish) faqatgina ularning yashash arealidagi soni va ovlash mumkin bo‘lgan soniga aniqlik kiritilgandan so‘ng ruxsat etiladi.

“Ijtimoiy tarmoqlarda bo‘rini sotayotgan fuqaro H.H. tomonidan bugungi kunga qadar Davlat ekologiya qo‘mitasiga bo‘rini tabiatdan ovlashga doir ruxsatnoma berish haqida arizasi kelib tushmagan”, — deyiladi munosabatda.

Davlat ekologiya qo‘mitasi tomonidan qo‘shimcha o‘rganish ishlari davom ettirilmoqda.

Eslatib o‘tamiz, 2021-yilning mayida Toshkent viloyatida rossiyalik ovchi “O‘zbekiston Qizil kitobi”iga kiritilgan Tyanshan qo‘ng‘ir ayig‘ini Ekologiya qo‘mitasi rahbari ruxsati bilan otib o‘ldirgani mahalliy jamoatchilikning keng muhokamalariga sabab bo‘lgan edi. Unda yana bitta Tyanshan qo‘ng‘ir ayig‘ini otishga ruxsatnoma bor edi. Ekologiya va atrof-muhitni muhofaza qilish davlat qo‘mitasi vakili jamoatchilik e’tirozi inobatga olinib, ovchiga ikkinchi ayiqni otishga ruxsat berilmasligini ma’lum qilgandi.