2021-yilda xalqaro pul o‘tkazmalari orqali respublikaga 8,1 milliard miqdorida valyuta mablag‘lari kelib tushgan. Bu haqda Markaziy bank tomonidan e’lon qilingan Ichki valyuta bozorining 2021-yil holati bo‘yicha qisqacha sharhida so‘z boradi.
Foto: “Daryo” / Madina Nurman
Ma’lum qilinishicha, ushbu ko‘rsatkich 2019−2020-yillarga nisbatan 34 foizga oshgan (6 milliard dollar). Shuningdek, xalqaro pul o‘tkazmalari orqali respublikadan 1,6 milliard dollar miqdorida valyuta mablag‘lari chetga jo‘natilgan.
2021-yil davomida tashqi savdo aylanmasining jadallashishi kuzatildi. Xususan, eksport tushumlari hajmi (oltin eksportini hisobga olmaganda) o‘tgan yilga nisbatan 34 foizga o‘sib, 11,6 milliard dollarga yetgan. Shuningdek, import to‘lovlari o‘tgan yilga nisbatan 25 foizga oshib, 25,7 milliard dollarni tashkil etgan.
Ichki valyuta bozorida chet el valyutasiga bo‘lgan talabning umumiy hajmi 2021-yilda 26,1 milliard dollarni tashkil etib, 2019 va 2020-yillarning tegishli davrlariga nisbatan mos ravishda 1,7 va 1,3 barobarga oshgan.
Ichki valyuta bozorida chet el valyutasidagi umumiy taklif hajmi 2021-yilda 22,9 milliard dollarni tashkil etib, o‘tgan yilning mos davriga nisbatan 1,6 barobarga o‘sgan (2020-yilda — 14,3 milliard dollar, 2019-yilda — 11,7 milliard dollar).
Xususan, mazkur davrda:
- xo‘jalik yurituvchi subyektlar tomonidan 11 milliard dollar miqdoridagi chet el valyutalari sotilgan bo‘lib, ushbu ko‘rsatkich o‘tgan yilga nisbatan 1,7 barobarga oshdi (2020-yilda – 6,7 mlrd. AQSH doll.);
- banklar va jismoniy shaxslar tomonidan sotilgan chet el valyutalari miqdori 7,4 milliard dollar yoki o‘tgan yilga nisbatan 44 foizga ko‘p bo‘lgan (2020-yilda – 5,1 milliard dollar).
Avvalroq O‘zbekistonda mehnat migrantlarining daromadini ikki tomonlama soliqqa tortmaslik belgilanayotgani, Rossiyadagi mehnat migrantlari maoshi qanchaligi, O‘zbekistonda “Yagona transchegaraviy pul o‘tkazmalari” to‘lov tizimi faoliyati yo‘lga qo‘yilishi to‘g‘risida xabar berilgandi.
