Shvetsiyada omikron shtammining mutatsiyasi aniqlandi

Shvetsiya janubidagi Uppsala shahrida omikron shtammining mutatsiya aniqlandi, deb xabar beradi SVT Nyheter telekanali.

Omikronning yangi varianti haqida Uppsaladagi Akademik laboratoriya ma’lum qilgan. Mutatsiya 14-yanvar kuni ro‘yxatdan o‘tkazilgan bo‘lib, u uch nafar bemorda aniqlangan.

Laboratoriyadagilarning ta’kidlashicha, hozircha omikron shtammining mazkur kenja turi o‘zidan oldingisi bilan raqobat qilishi yoki qila olmasligi noma’lum.

Omikronning yangi mutatsiyasi BA.2 nomini olgan. Telekanal ma’lumotlariga ko‘ra, mazkur mutatsiya Daniya, Norvegiya va Hindistonning Kalkuttasida ham aniqlangan.

Avvalroq Moderna bir necha hafta ichida omikronga qarshi vaksinaning klinik sinovlarini boshlashi, Pekinda omikron shtammi bilan kasallanishning dastlabki holati qayd etilgani, Belgiya va Chexiyada koronavirus cheklovlariga qarshi norozilik aksiyasi bo‘lib o‘tgani to‘g‘risida xabar berilgandi.

Koronavirusning yangi omikron shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli omikronni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda omikron bilan qayta kasallanish ehtimoli yuqoriligini ma’lum qildi.