Indoneziya hukumati mamlakat poytaxti Yava orolidan sharqdagi Kalimantan oroliga ko‘chirilishini e’lon qildi. Buning uchun qariyb 32 milliard dollar ajratilgan, deb xabar beradi “TASS”.

Foto: The Nomadvisor

Mamlakat prezidenti Joko Vidodo Indoneziya poytaxtini Jakartadan ko‘chirish borasidagi rejalarni 2019-yilda ma’lum qilgandi. Biroq pandemiya sabab loyihani amalga oshirish ishlari to‘xtab qolgan. Rejaga ko‘ra, poytaxtni ko‘chirish ishlari 2024-yilda yakunlanadi.

Bu kabi qaror Jakarta va uning 30 millionlik aholisi bilan bog‘liq kompleks muammolar sabab qabul qilingan. Uzundan-uzoq tirbandliklardan tashqari, shahar suv ostiga cho‘kib bormoqda — yiliga taxminan 15 santimetr.

Yangi poytaxt Nusantara deb atalib, uning tarjimasi “arxipelag” ma’nosini beradi.

“Ushbu nom Indoneziyadan tashqarida ham keng tarqalgan va davlatni xuddi arxipelag kabi qisqacha tavsiflaydi”, — deydi milliy rivojlanishni rejalashtirish vaziri Suxarso Monoarfa.

Ta’kidlash kerakki, Indoneziyaning o‘zi 18 mingta oroldan iborat dunyodagi eng yirik arxipelagda joylashgan.

Avvalroq Jakartadagi ko‘p sonli tirbandliklar sababli mehnat unumdorligini yo‘qotish yiliga taxminan 7 milliard dollarni tashkil qilishi ma’lum bo‘lgandi.

Ma’lumotlarga ko‘ra, aholining atigi 5,8 foizi Kalimantanda istiqomat qiladi va YaIMning 8,2 foizini tashkil qiladi. Orolda zamonaviy aeroportlar va yaxshi yo‘llar, shuningdek, ichimlik suvi mavjud. Rasmiylar asrlar davomida poytaxt bo‘lib xizmat qilishi mumkin bo‘lgan zamonaviy, aqlli va yashil shahar qurishni rejalashtirmoqda.

2030-yilga kelib Jakarta aholisi 35,6 million nafarga yetishi kutilmoqda. Bu esa dunyoning eng ko‘p aholisi bo‘lgan shaharga aylanishiga yordam beradi. Shahar mamlakatning asosiy tijorat markazi bo‘ladi. Jakartaning suv ostida qolishining oldini olish uchun rasmiylar katta to‘lqinlardan himoya qiladigan ulkan devor qurishni rejalashtirmoqda.