AQSh harbiy-dengiz kuchlari lazer qurolini sinovdan o‘tkazdi. Bu haqda AP xabar bergan.
Sinovlar Qizil dengizdagi Aden bo‘g‘ozida o‘tkazildi. AQShning Portlend kemasidagi lazer quroli vositasida dengizdagi nishon yo‘q qilindi.
Qayd etilishicha, 2020-yilda Portlend uchib kelayotgan dronni xavfsizlantirish uchun lazerdan foydalangan.
Aden ko‘rfazi ayni vaqtda urush ketayotgan Yaman yaqinida joylashgan. Mamlakatda 2014-yilda xusiylar poytaxtni egallab olganidan buyon qurolli to‘qnashuvlar davom etmoqda. Jangarilar shu atrofdagi dengiz yo‘llariga masofadan boshqariladigan qayiqlar joylashtirgan va ularga portlovchi uskunalar o‘rnatgan.
Katta ehtimol bilan AQSh harbiylari sinovda o‘tkazgan lazer quroli kelgusida shu kabi masofadan boshqariladigan katerlarni xavfsizlantirish maqsadida sinovdan o‘tkazilmoqda.
Eslatib o‘tamiz, avval Hindiston yangi zenit raketasini test qilgan. Sinovlar Odisha shtati sohillaridagi Chandipur kompleks tajriba poliganida o‘tkazilgandi. Raketa vertikal uchirish sozlamalari vositasida sinalgan.
Shuningdek, Rossiya ham koinotda yangi qurolini sinovdan o‘tkazgan. Moskva sun’iy yo‘ldoshga qarshi qurolni o‘z uskunalaridan biriga qarshi test qilib ko‘rgan va mazkur harakati orqali boshqa mamlakatlarning kosmik missiyalarini xavf ostida qoldirgan, deya voqeaga munosabat bildirgan AQSh davlat departamenti.
Avval Xitoyning yangi gipertovushli qurolni sinov qilgani, may oyida AQSh harbiy dengiz kuchlari uchuvchisiz boshqariladigan samolyotlarga qarshi lazer qurolini sinovdan o‘tkazgani xabar qilingandi.
Izoh (0)