Fransiya sog‘liqni saqlash vaziri Olivye Veran koronavirusdan kasallanganlar sonining ko‘payishi munosabati bilan yangi cheklov choralarini e’lon qildi. Hukumat mamlakatdagi pandemiya bilan bog‘liq vaziyatni “beshinchi to‘lqin” deb atamoqda.
Foto: Reuters
Fransiyada, xususan, PZR-testi natijasining yaroqlilik muddati qisqartirildi. Agar shu kungacha testning natijasi salbiy chiqqandan so‘ng 72 soat davomida jamoat joylariga borish mumkin bo‘lgan bo‘lsa, endi bu muddat 24 soatgacha qisqartirildi.
Bundan tashqari, jamoat joylarida niqob taqish rejimi qaytarilmoqda. Hatto koronavirusga qarshi emlanganlar ham restoran va teatrlarda niqobda bo‘lishi shart. Shu bilan birga, mahalliy hokimiyat organlari ommaviy tadbirlar, jumladan, rojdestvo yarmarkalarida ham mustaqil ravishda cheklovlar joriy etishi mumkin bo‘ladi.
Sog‘liqni saqlash vaziri, shuningdek, vaksinaning uchinchi — buster dozasini ikkinchi dozadan keyin 5 oy o‘tgach olish kerakligini aytdi. Aks holda, ikkita doza olgan odamlardagi “salomatlik pasporti” (vaksinatsiya sertifikati) haqiqiy hisoblanmaydi.
Veranning ishontirib aytishicha, hukumat komendantlik soati yoki korxonalarni majburiy yopish kabi choralarni qo‘llamaydi.
Fransiyaning Paster instituti ma’lumotlariga ko‘ra, koronavirusning hozirgi to‘lqini dekabr oyi boshida eng cho‘qqiga chiqadi. O‘tgan bir kun davomida butun Fransiya bo‘ylab 32 591 kishida infeksiya qayd etilgan. Bu aprel o‘rtalaridan beri eng yuqori ko‘rsatkich. Shuningdek, so‘nggi sutkada COVID-19 oqibatida 80 kishi halok bo‘lgan.
Oxirgi ikki hafta ichida Avstriya, Slovakiya va Niderlandiyada yangi cheklovlar joriy etildi. Mazkur mamlakatlarda ham kasallanishning jiddiy o‘sishi kuzatilmoqda.
Jahon sog‘liqni saqlash tashkilotining ogohlantirishicha, Yevropada agar shoshilinch cheklov choralari ko‘rilmasa, 2022-yilning mart oyigacha koronavirusdan yana 500 mingta o‘lim qayd etilishi mumkin.
