“Tolibon” barcha harbiylarni xizmatga qaytishga chaqirdi

Afg‘onistonda hokimiyatni egallab olgan “Tolibon” harakati tomonidan tuzilgan vazirlar mahkamasi avvalgi hukumat davrida faoliyat yuritgan muassasalarning barcha harbiylari va xodimlarini ishga qaytishga chaqirdi.

“Avvalgi rejimning barcha xodimlari — harbiylar ham, oddiy fuqarolar ham — huquq-tartibot organlarida xizmat qilishga qaytish taklifini oldi”, — dedi toliblar vakili, IIV matbuot kotibi Qori Said Hostiy.

Kobulda xavfsizlik bilan bog‘liq vaziyat haqida gapirar ekan, buning uchun bir qator tuzilmalar, shu jumladan, IIV, milliy xavfsizlik organlari va maxsus vazifali kuchlar javob berishini ta’kidladi.

Kobul chiroqsiz qoldi

Afg‘oniston shimolida yuz bergan avariya tufayli O‘zbekistondan Kobulga elektr yetkazib berish to‘xtatildi. Shahar chiroqsiz qoldi. Ayni paytda elektr toki faqat kasalxonalarga va davlat muassasalariga uzatilmoqda.

“Bag‘lon viloyatidagi Dandi-Shahobiddin tumanida kuzatilgan texnik muammolar tufayli O‘zbekistondan Kobulga yetkaziladigan elektr ta’minoti uzib qo‘yildi. Kompaniya texnik xodimlari muammoni bartaraf qilish bilan shug‘ullanmoqda”, — deya ma’lum qilishdi Da Afghanistan Breshna Sherkat energetika kompaniyasida.

Afg‘onistonning 150 dan ziyod OAVlari o‘z ishini to‘xtatdi

Afg‘onistonda jurnalistika hokimiyatga “Tolibon” kelganidan keyin eng ko‘p talafot ko‘rgan sohalardan biriga aylandi. O‘shandan buyon kamida 153 ta ommaviy axborot vositasi o‘z faoliyatini to‘xtatgan, xorijiy nashrlarning mahalliy idoralari ham yopilib ketgan.

Kobul

Foto: “TASS”

Mamlakat iqtisodiyotidagi inqirozli vaziyat tufayli ko‘plab bosma nashrlar moliyaviy qiyinchiliklarni deb to‘liq onlayn-formatga o‘tgan yoki yopilgan.

“Kutilganidek, toliblar tomonidan kiritilishni boshlagan senzura siyosati ham salbiy ta’sirini o‘tkazmoqda”, — dedi “TASS” manbalaridan biri. Human Rights Watch huquqni himoya qilish tashkiloti qayd etishicha, “islom qadriyatlariga hurmat bilan munosabatda bo‘ladigan” OAVlar faoliyatiga to‘sqinlik qilmaslik haqida bergan va’dalariga qaramasdan, toliblar o‘z qoidalari va talablarini joriy qilmoqdaki, ular amalda matbuotning to‘laqonli faoliyatiga xalal bermoqda.

Ijtimoiy-siyosiy mavzularni yorituvchi nashrlargina bosim ostida qolmayapti, aynan ko‘ngilochar matbuot birinchi o‘rinda vaziyat qurbonlariga aylandi, chunki ularning kontenti islom qoidalariga zid bo‘lgan.

“Tolibon” xalqaro standartlarga mos davlat yaratishga intilmoqda

Toliblar Afg‘onistonda mamlakat ehtiyojlariga javob beradigan va xalqaro standartlarga mos bo‘lgan siyosiy tuzilmani yaratishni ko‘zda tutmoqda, dedi tashqi ishlar vaziri vazifasini bajaruvchi Amir Xon Muttaqiy.

“‘Islom amirligi’ (toliblar o‘z davlatini shunday ataydi) dunyoga va mintaqadagi mamlakatlarga do‘stona munosabatlar haqida signal yubordi. Biz hech qaysi mamlakatning ichki ishlariga aralashishga intilmaymiz va boshqalardan ham shuni kutamiz. Biz Afg‘onistonning jahon yo‘llari chorrahasi sifatidagi salohiyatidan to‘liq foydalanishga intilamiz”, — dedi u.

“Tolibon” delegatsiyasi Anqarada muzokaralar o‘tkazadi

Amir Xon Muttaqiy rahbarligidagi “Tolibon” delegatsiyasi Anqaraga jo‘nab ketdi.

TIV matbuot kotibi Abdulqahhor Balxiyning so‘zlariga ko‘ra, tashrif Turkiya tashqi ishlar vaziri Mavlud Chavusho‘g‘lining rasmiy taklifiga ko‘ra amalga oshirilmoqda.

“Delegatsiya Turkiyaning yuqori mansabli vakillari bilan o‘zaro manfaatli bo‘lgan masalalar bo‘yicha muzokaralar olib boradi, — deb yozdi Balxiy Twitter’da. — Aloqalarni yaxshilash, savdo, gumanitar yordam, migratsiya va aviatransport sohalaridagi hamkorlik bo‘yicha qator masalalar ko‘rib chiqiladi”.