O‘zbekistonlik MMA jangchisi Nursulton Ro‘ziboyev braziliyalik raqibini 1-raunddayoq nokautga uchratib, chempionlik kamariga ega chiqdi

Rossiyaning Moskva shahrida 12-sentabr kuni Open FC 10 musobaqasi bo‘lib o‘tdi. Unda bir qator o‘zbekistonlik yakkakurashchilar o‘z ishtirokini o‘tkazdi.

O‘rta vazn toifasida harakat qiladigan o‘zbekistonlik jangchi Nursulton Ro‘ziboyev chempionlik kamari uchun Braziliya vakili Aleks de Pauloga qarshi bahs olib bordi. Nursulton birinchi raundda parter holatida raqibiga zarbalar seriyasini amalga oshirdi, hakam jangni to‘xtatdi va texnik nokaut qayd etdi.

Shu tariqa Ro‘ziboyev o‘rta vazn toifasida Open FC promoushenining chempionlik kamariga ega chiqdi.

Yana bir o‘zbekistonlik yakkakurashchi Mashrabjon Ro‘ziboyev rossiyalik Aleksandr Jarkovni 1-raundning 18-soniyasidayoq nokautga uchratdi. Rahmatullo Sattorov esa Rossiya vakili Ilya Bochkovga yutqazib qo‘ydi.