Xiaomi’ning yangi Xiaomi Mix4 flagmani real vaqtda sun’iy intellekt yordamida subtitrlarni qo‘shishga imkon beradigan Xiaoai Translation funksiyaga ega bo‘ldi. Bu Android’lardagi Google Live Caption’ning muqobili hisoblanadi, deb xabar beradi IXBT.

Foto: IXBT

Xiaomi muhandislarining so‘zlariga ko‘ra, Xiaoai Translation’ning yangi versiyasi kompaniya tomonidan yaratilgan sinxron tarjima texnologiyasiga asoslangan va eng ilg‘or sun’iy intellekt texnologiyasi hisoblanadi. Yangi Xiaoai Translation funksiyasi foydalanuvchilarga istalgan vaqtda va istalgan joyda tezlik bilan tarjimalarni amalga oshirish imkonini beradi. Foydalanuvchilar boshqaruv markazini pastga tortish orqali tarjima instrumentini faollashtirishi mumkin.

Xiaoai Translation yordamida videolarni, onlayn konferensiya yoki ovozli qo‘ng‘iroqlarni real vaqt rejimida tarjima qilsa bo‘ladi. Xiaomi’ning ta’kidlashicha, tarjima barqaror, aniq va tez ishlaydi. Bundan tashqari, u ko‘plab ingliz aksentlariga moslasha oladi.

Ta’kidlanishicha, Xiaoai Translation tarjima mexanizmlari muntazam yaxshilanib boradi. Shu bilan birga, Xiaoai Translation’da ikkinchi darajali tillar soni ham ko‘payadi. Tarjimaning mazkur funksiyasi sentabr oyida MIUI 12.5 da ko‘plab Xiaomi smartfonlari uchun ishga tushiriladi.

Avvalroq Xiaomi Mi 11 da tunda suratga olishni ta’minlovchi “aqlli” rejim paydo bo‘lgani to‘g‘risida xabar berilgandi.