Yaponiyalik dizayner gugurtlardan aqlbovar qilmas stop-moushen animatsiyani yaratdi. Ijtimoiy tarmoq foydalanuvchilari uni “sehrgar” deb atamoqda

YouTube’da tokiolik dizayner Tomoxiro Okadzaki “Gugurtlar” nomli roligi mashhurlikka erishdi, deb xabar beradi Esquire.

Video bir necha daqiqa davom etadi, ammo uni yaratish uchun ancha mehnat qilingan. Yanvar oyidan avgustga qadar dizayner Instagram’dagi sahifasi orqali gugurtlar bilan bog‘liq qisqa syurrealistik videolar bilan bo‘lishib kelgan va yakunda ulardan sakkiz daqiqali bitta rolik yiqqan.

Dizayner o‘z ishida stop-moushen texnikasidan foydalangan. Videoda gugurtlar turli deformatsiyalarga uchraydi, suyuqlashadi, yalpoqlashadi, ko‘payadi, buyumlar orasidan o‘tadi.

Okadzaki gugurtlardan tashqari oddiy materiallar — qog‘oz, ip, qalam va boshqa qo‘l ostidagi predmetlardan foydalangan.

Ijtimoiy tarmoqlar foydalanuvchilari yaponiyalikning videosini hayrat bilan qabul qilgan. Rolik ostidagi izohlarda Okadzakini “sehrgar”, uning ishini esa “fenomenal” deb atamoqda.

Eslatib o‘tamiz, 2016-yilda yaponiyalik dizaynerlar tirik odamdan ajratib bo‘lmaydigan kompyuter qizni yaratgandi.