Xalq ta’limi tizimida olti oyda 65,1 mlrd so‘mlik o‘zlashtirish va kamomad aniqlangan

24-avgust kuni Oliy Majlis Qonunchilik palatasining navbatdagi majlisida deputatlar Davlat budjetining va davlat maqsadli jamg‘armalari budjetlarining 2021-yil birinchi yarim yillik yakunlari bo‘yicha ijrosi to‘g‘risidagi hisobotni ko‘rib chiqdi. Bu haqda quyi palata matbuot xizmati xabar berdi.

Kun tartibidagi masala yuzasidan moliya vaziri Temur Ishmetov ma’ruza qilgan. Majlisda ta’kidlanganidek, 2021-yilning yanvar—iyun oylari natijalariga ko‘ra, O‘zbekiston iqtisodiyoti 6,2 foizga o‘sgan. Shu vaqt davomida respublikamiz YaIM hajmi 318,5 trillion so‘mni tashkil etib, iqtisodiy o‘sish sanoat 8,5 foizga, qurilish — 0,1 foizga, qishloq, o‘rmon va baliq xo‘jaligi — 1,8 foizga hamda xizmatlarni 8,0 foizga o‘sishi bilan ta’minlangan.

Shuningdek, yig‘ilishda “Milliy tiklanish” demokratik partiyasi fraksiyasi tomonidan ta’lim-tarbiyaga budjetdan yetarlicha mablag‘ ajratilayotgani, lekin Xalq ta’limi vazirligi bu mablag‘ni o‘z vaqtida o‘zlashtirmayotgani qayd etilgan. Masalan, rivojlantirish dasturlari uchun ajratilgan mablag‘ning 68 foizi o‘zlashtirilgan, Islohotlarga ko‘maklashish jamg‘armasi uchun ajratilgan mablag‘ning esa 20 foizi ishlatilmagan.

Hisobot davrida Xalq ta’limi tizimida 65,1 milliard so‘m o‘zlashtirish va kamomad aniqlanib, bu 2020-yilning mos davriga nisbatan uch martaga oshgan. Shu jihatdan ta’lim sohasida o‘z yechimini kutib turgan masalalarni zudlik bilan hal etgan holda bu boradagi harakatlarni jonlantirish lozimligini qayd etilgan.

Avvalroq Samarqanddagi davlat muassasalarida 563 mln so‘m budjet mablag‘lari talon-toroj qilingani, Jizzaxda 123 mln so‘m kredit mablag‘larni talon-toroj qilib o‘zlashtirgan rahbarga jinoiy ish qo‘zg‘atilgani to‘g‘risida xabar berilgandi.