Dunyo va o‘zbek sportiga oid 17-avgust kunining muhim xabarlari dayjesti bilan tanishing.

O‘zbekiston

Foto: Instagram / Saidyoqub Qahramonov

UFC’da ishtirok etadigan O‘zbekiston vakillari soni 4 nafarga yetadi. Samarqandda tug‘ilgan Saidyoqub Qahramonov 21-avgust kuni (Toshkent vaqti bilan 22-avgust tongi) Las-Vegasda bo‘lib o‘tadigan UFC on ESPN 29 musobaqasida jang qiladi. Unga guamlik Trevin Jons (13-6) raqib bo‘ladi. Bu haqda sportchining o‘zi “Daryo”ga ma’lum qildi.

Ma’lumot uchun, ayni paytda Mahmud Murodov, Zarrux Adashev va Liliya Shokirova UFC promoushenida harakat qilmoqda.

Foto: Instagram / Sabina Toshkenboyeva

O‘zbekistonda yana bir sportchilar oilasi paydo bo‘ladi. Badiiy gimnastikachi Sabina Toshkenboyeva va taekvondochi Niyoz Po‘latov turmush quradi. Nikoh oqshomi 2-sentabr kuni bo‘lib o‘tadi.

Avvalroq Tokio—2020 Olimpiadasi bronza medali sohibi Bekzod Abdurahmonov va ushbu Olimpiya o‘yinlarida O‘zbekiston bayroqdori bo‘lgan taekvondochi Nigora Tursunqulova turmush qurgandi.

Foto: Qashqadaryo viloyati hokimligi matbuot xizmati

Tokio—2020 Olimpiadasida ishtirok etgan bokschi Rayhona Qodirovaga prezident sovg‘asi Nexia 3 avtomobili topshirildiTokio Olimpiya o‘yinlarida -60 kg vazn toifasida bahs olib borgan Rayhona Qodirova 1/8 finalda Kongo DR vakili Yumba Naomiyeni 5:0 hisobida mag‘lub etgan, chorak finalda esa braziliyalik Beatris Ferreyraga imkoniyatni boy bergandi.

Jahon

Foto: Twitter

“Barselona” hujumchisi Martin Breytueyt klub rahbariyatidan maoshini oshirishni so‘ramoqda, deya yozmoqda Mundo Deportivo nashri.

O‘zini asosiy tarkib futbolchisi deb hisoblayotgan daniyalik, agar yangi bitim shartlari qayta ko‘rib chiqilmasa, “Barselona”dan shartnomani bekor qilishni so‘raydi.

Foto: “Roma”

“Roma” “Chelsi” hujumchisi Temmi Abraham transferini e’lon qildi. Rim klubi 23 yoshli futbolchi uchun 40 million yevro to‘langanini xabar qildi. Shuningdek, “Chelsi” futbolchi ko‘rsatadigan o‘yinga qarab, turli xil bonuslar ham olishi mumkin. Abraham “Roma” bilan 5 yilga mo‘ljallangan shartnoma imzolagan.

Foto: Twitter

Yevropa Superligasining 9 jamoasi “Milan”, “Chelsi”, “Arsenal”, “Atletiko”, “Liverpul”, “Manchester Yunayted”, “Manchester Siti”, “Inter” va “Tottenhem” Yevropa klublari assotsiatsiyasiga qaytdi. Bu haqda tashkilot rasmiy saytida xabar berildi.

Hozirda faqat “Yuventus”, “Barselona” va “Real” klublari Superliga g‘oyasidan voz kechmagan.

Afg‘oniston terma jamoasi mamlakatda yuzaga kelgan notinch vaziyat sababli Tokioda bo‘lib o‘tadigan Paralimpiya o‘yinlarida ishtirok etmaydigan bo‘ldi, deb yozmoqda The Japan Times Xalqaro olimpiya qo‘mitasiga tayanib.

“Afsuski, Afg‘oniston milliy paralimpiya qo‘mitasi Tokio—2020 Paralimpiya o‘yinlarida qatnashmaydi. Mamlakatdagi hozirgi qiyin vaziyat tufayli barcha aeroportlar yopiq va ular Tokioga bora olmaydi. Jamoa va rasmiylar bu qiyin paytda xavfsizlikda bo‘ladi deb umid qilamiz”, — dedi XOQ vakili Kreyg Spens.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!