Ўзбекистон
UFC’да иштирок этадиган Ўзбекистон вакиллари сони 4 нафарга етади. Самарқандда туғилган Саидёқуб Қаҳрамонов 21 август куни (Тошкент вақти билан 22 август тонги) Лас-Вегасда бўлиб ўтадиган UFC on ESPN 29 мусобақасида жанг қилади. Унга гуамлик Тревин Жонс (13-6) рақиб бўлади. Бу ҳақда спортчининг ўзи «Дарё»га маълум қилди.
Маълумот учун, айни пайтда Маҳмуд Муродов, Заррух Адашев ва Лилия Шокирова UFC промоушенида ҳаракат қилмоқда.
Ўзбекистонда яна бир спортчилар оиласи пайдо бўлади. Бадиий гимнастикачи Сабина Тошкенбоева ва таэквондочи Ниёз Пўлатов турмуш қуради. Никоҳ оқшоми 2 сентябрь куни бўлиб ўтади.
Аввалроқ Токио—2020 Олимпиадаси бронза медали соҳиби Бекзод Абдураҳмонов ва ушбу Олимпия ўйинларида Ўзбекистон байроқдори бўлган таэквондочи Нигора Турсунқулова турмуш қурганди.
Жаҳон
«Барселона» ҳужумчиси Мартин Брэйтуэйт клуб раҳбариятидан маошини оширишни сўрамоқда, дея ёзмоқда Mundo Deportivo нашри.
Ўзини асосий таркиб футболчиси деб ҳисоблаётган даниялик, агар янги битим шартлари қайта кўриб чиқилмаса, «Барселона»дан шартномани бекор қилишни сўрайди.
«Рома» «Челси» ҳужумчиси Тэмми Абраҳам трансферини эълон қилди. Рим клуби 23 ёшли футболчи учун 40 миллион евро тўланганини хабар қилди. Шунингдек, «Челси» футболчи кўрсатадиган ўйинга қараб, турли хил бонуслар ҳам олиши мумкин. Абраҳам «Рома» билан 5 йилга мўлжалланган шартнома имзолаган.
Европа Суперлигасининг 9 жамоаси «Милан», «Челси», «Арсенал», «Атлетико», «Ливерпуль», «Манчестер Юнайтед», «Манчестер Сити», «Интер» ва «Тоттенҳэм» Европа клублари ассоциациясига қайтди. Бу ҳақда ташкилот расмий сайтида хабар берилди.
Ҳозирда фақат «Ювентус», «Барселона» ва «Реал» клублари Суперлига ғоясидан воз кечмаган.
Афғонистон терма жамоаси мамлакатда юзага келган нотинч вазият сабабли Токиода бўлиб ўтадиган Паралимпия ўйинларида иштирок этмайдиган бўлди, деб ёзмоқда The Japan Times Халқаро олимпия қўмитасига таяниб.
«Афсуски, Афғонистон миллий паралимпия қўмитаси Токио—2020 Паралимпия ўйинларида қатнашмайди. Мамлакатдаги ҳозирги қийин вазият туфайли барча аэропортлар ёпиқ ва улар Токиога бора олмайди. Жамоа ва расмийлар бу қийин пайтда хавфсизликда бўлади деб умид қиламиз», — деди ХОҚ вакили Крейг Спенс.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)