Ijtimoiy tarmoqlarda Qarshi shahrida yashovchi 18 yoshli qiz besh oy davomida zo‘rlab kelingani sabab o‘z joniga qasd qilganiga oid videolavha tarqaldi. Viloyat IIB axborot xizmatining ma’lum qilishicha, hozirda ushbu holat bo‘yicha surishtiruv olib borilmoqda.
Kadr: YouTube
Videolavhada aytilishicha, shaharning “Qavali” mahallasida yashovchi 18 yoshli Sh.J. ismli qiz Shahzod Q. tomonidan 2020-yil oktabridan 2021-yilning 1-fevraliga qadar zo‘rlab kelingan. Shahzod Q. qizning nomusiga teggan vaqtida olgan suratlari bilan uni sharmanda qilish bilan qo‘rqitib, majburan jinsiy aloqa qilib kelgan.
Jabrlanuvchi ota-onasining so‘zlariga ko‘ra, qizi o‘zini ikki marta o‘ldirmoqchi bo‘lgan. U 12 dona uyqu va boshqa dorilarni ichib yuborgan, o‘zini osmoqchi bo‘lganida esa otasi qaytarib qolgan.
Qashqadaryo viloyati IIBning ma’lumotlariga ko‘ra, holatga oydinlik kiritish maqsadida Sh.J.ga nisbatan bir necha bor sudga oid tibbiyot ekspertizasi tayinlanib, ekspertiza xulosalari olingan.
Tergovga qadar tekshirish natijasiga ko‘ra, Qarshi shahar IIO FMB 3-sonli IIB huzuridagi Tergov bo‘limi surishtiruvchisi tomonidan Shahzod Q.ning harakatlarida jinoyat alomatlari yo‘q deb topilib, to‘plangan hujjatlarga asosan Jinoyat-protsessual kodeksining 83-moddasi (reabilitatsiya uchun asoslar) 2-bandi tartibida jinoyat ishi qo‘zg‘atishni rad etish to‘g‘risida qaror qabul qilingan va natijasi arizachiga aloqa xati orqali yozma ma’lum qilingan.
Ta’kidlanishicha, hozirda holat bo‘yicha surishtiruv olib borilmoqda.
Bundan avval Buxoroda 14 yoshli qizni zo‘rlab kelgan cho‘pon 3 yilga ozodlikdan mahrum qilingani, Navoiyda maktab o‘quvchisi homilador bo‘lib qolgani hamda Toshkent viloyatida 14 yoshli qizning nomusiga tegganlikda gumonlanayotgan shaxs qamoqqa olingani haqida xabar berilgandi.
