Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 1-avgust kungi chiqishlarini yakunladi.

Yunon-rum kurashi

Rio—2016 Olimpiadasi sovrindori Elmurat Tasmuradov (-60 kg) dastlabki bosqichda O‘zbekistonda tug‘ilgan, hozirda Ukraina bayrog‘i ostida qatnashayotgan Lenur Temirovga to‘qnash keldi. Unda Temirov 5:0 hisobida g‘alaba qozonib, Elmuratni musobaqadan chiqarib yubordi.

Foto: MOQ

Mo‘minjon Abdullayev (-130 kg) birinchi davrada estoniyalik Artur Vitininni taslim etdi. Abdullayev chorak finalda chililik Yasmani Fernandesga qarshi kurash olib bordi va 0:2 hisobida yutqazib qo‘ydi.

Temirov va Fernandes finalga qadar yetib bora olmadi. Shu tariqa o‘zbekistonlik kurashchilar bronza uchun kurash olib borish imkoniyatidan mahrum bo‘ldi va Olimpiada bilan xayrlashdi. Qayd etish kerak, Tasmuradov 2016-yilgi Rio Olimpiya o‘yinlarida bronza medaliga ega chiqqandi.

Yengil atletika

Darya Reznichenko uzunlikka sakrash bo‘yicha saralash bahslarida ishtirok etdi. B guruhida ishtirok etgan O‘zbekiston vakili 6.19 metr natija qayd etdi. Tabiiyki, bu saralashdan o‘tish uchun kamlik qildi va Reznichenko shu nuqtada Olimpiadadagi ishtirokini yakunladi.

Boks

+91 kg vazn toifasida ishtirok etayotgan Bahodir Jalolov chorak finalda hindistonlik Satish Kumarga qarshi bahs yuritdi va kutilganidek ishonchli g‘alabani qo‘lga kiritdi. Shu tariqa Bahodir yarim finalga yo‘l olish qatorida o‘zi uchun kamida bronza medalini naqd qilib qo‘ydi. Yarim finalda o‘zbekistonlik bokschi Buyuk Britaniya vakili Freyzer Klarkka qarshi ringga ko‘tariladi.

Foto: Getty Images

Og‘ir atletika

-76 kg vazn toifasida O‘zbekiston sharafini himoya qilgan Kumushxon Fayzullayeva dast ko‘tarishda 101 kg, siltab ko‘tarishda 126 kg, umumiy hisobda esa 227 kg natija qayd etdi. Bu orqali Kumushxon oltinchi pog‘onani band etdi va Olimpiya o‘yinlari sovriniga ega chiqolmadi.

Foto: MOQ

Shu tariqa Tokio—2020 Olimpiadasida ishtirok etmagan og‘ir atletikachilardan faqat Akbar Jo‘rayev qoldi. -109 kg vazn toifasi vakili 3-avgust kuni o‘z ishtirokini o‘tkazadi.