Bangladesh janubidagi Koks-Bazar provinsiyasida kuchli musson yomg‘irlari tufayli yuzaga kelgan toshqinlar 200 ming kishiga zarar yetkazdi. Bu haqda Reuters xabar berdi.

Foto: Anadolu Agency

Yomg‘ir oqibatida provinsiya bo‘ylab sodir bo‘lgan toshqinlar va ko‘chkilar 15 kishining hayotiga zomin bo‘ldi. Mamlakatning 13 ming fuqarosi vaqtinchalik lagerlarga ko‘chib o‘tdi.

Suv toshqinlari Koks-Bazarda joylashgan qochoq-rohinjalar lageriga ham ta’sir ko‘rsatdi. Tabiiy ofat sababli olti nafar qochoq rohinja halok bo‘ldi, 21 mingdan ortiq odam yaralandi.

Janubiy Koks-Bazar provinsiyasida 2017-yilda Myanmada sodir etilgan genotsiddan qochib kelgan yuz minglab musulmon rohinjalar yashaydi. Provinsiyada dunyodagi eng katta qochoqlar lagerlaridan biri joylashgan. “To‘rt yil ichida men lagerlarda bunday suv toshqini ko‘rmaganman”, — dedi hodisadan zarar ko‘rgan qochqinlardan biri.

29-iyulga o‘tar kechasi Afg‘oniston sharqidagi Nuriston viloyatida kuchli suv toshqini yuz bergandi, oqibatda 40 dan 150 nafargacha odam halok bo‘lgan. Viloyatning Mexerdish qishlog‘i tabiiy ofat natijasida to‘liq vayron bo‘lgan. Ta’kidlanishicha, ushbu hudud “Tolibon” nazorati ostida bo‘lib, shu sababli u yerga gumanitar yordam yetkazishning iloji bo‘lmagan.

Avvalroq Yevropada suv toshqinlari tufayli 200 nafardan ziyod odam halok bo‘lgani, Xitoyda suv toshqini tufayli 100 ming kishi evakuatsiya qilinib, metroni suv bosishi oqibatida 12 kishi halok bo‘lgani haqida xabarlar berilgandi.