Ulug‘bek Rashidov finalda britaniyalik raqibini taslim qilib, O‘zbekistonga Tokio—2020 Olimpiadasidagi ilk oltin medalni taqdim etdi

Yaponiyaning Tokio shahri mezbonlik qilayotgan Olimpiadada 25-iyul kuni taekvondo bo‘yicha final bahslari o‘tkazildi.

Hal qiluvchi bahsda o‘zbekistonlik taekvondochi Ulug‘bek Rashidov britaniyalik raqibi Bredli Sindenni mag‘lub etib, Tokio Olimpiadasida O‘zbekistonga ilk oltin medalni taqdim etdi.

Rashidov uch raund yakuniga ko‘ra 32:29 hisobida g‘alaba qozondi. Shu tariqa u taekvondo bo‘yicha Olimpiadada chempion bo‘lgan ilk sportchi sifatida O‘zbekiston tarixiga kirdi.

Ulug‘bek yarim finalda Bosniya va Gersegovina vakili Nedzad Hushichni 28:5 hisobida yengib, O‘zbekiston uchun dastlabki medalni naqd qilgandi. Sinden esa yarim finalda xitoylik Shuai Jaoni 33:25 hisobida yengdi.

Sinden o‘z yurishini 1/8 finaldan boshladi va unda Yangi Zelandiya vakili Tom Byornsga imkon qoldirmadi (53:8). Chorak finalda esa britaniyalik sportchi turkiyalik Xoqon Rechberni 39:19 hisobida taslim etdi.

Ulug‘bek 1/16 finalda malilik Seydu Mofanani 38:17 hisobida mag‘lub etdi. O‘zbekistonlik sportchi chorak final yo‘llanmasi uchun jangda 3 karra jahon chempioni, Olimpiya o‘yinlarining 2 karra sovrindori, ushbu vazn toifasining birinchi raqamli sportchisi janubiy koreyalik Li De Hun bilan asosiy vaqtda 19:19 hisobida qayd etdi. Bahs taqdirini hal qilgan “Oltin zarba”da Rashidov 2 ochko qo‘lga kiritib, chorak finalga yo‘l oldi. Rashidov 1/4 finalda eronlik Mirhoshim Hussainini 34:22 hisobida yengdi.

Rashidovning finaldagi raqibi Bredli Sinden -68 kg vazn toifasida amaldagi Jahon chempioni hisoblanadi. U 2019-yilda Manchester shahrida o‘tkazilgan musobaqada g‘oliblikni qo‘lga kiritgandi. Sinden, shuningdek, ushbu vazn toifasining ikkinchi raqamli vakili hisoblanadi.

Ma’lumot uchun, Ulug‘bek Rashidov 2002-yil 23-mart kuni Toshkent shahrida tug‘ilgan.

U 2018-yilda Buenos-Ayresda (Argentina) bo‘lib o‘tgan 2018-yilgi yozgi o‘smirlar Olimpiya o‘yinlarida 48 kilogrammgacha vazn toifasida kumush medalini qo‘lga kiritgan, finalda rossiyalik sportchi Dmitriy Shishkoga imkoniyatni boy berib qo‘ygan.

2019-yilda esa taekvondo bo‘yicha o‘smirlar o‘rtasidagi Osiyo chempionatida 55 kilogrammgacha vazn toifasida oltin medalga ega chiqqan. Xuddi shu yili u Butunjahon armiya o‘yinlarida 58 kilogrammgacha vazn toifasida oltin medalni qo‘lga kiritadi, Ulug‘bek hal qiluvchi bahsda xitoylik raqibi Lyan Yuyshuayni taslim etgandi.