Bosh prokuratura huzuridagi Departament hamda DXXning Qoraqalpog‘iston Respublikasi boshqarmalari tomonidan o‘tkazilgan tezkor tadbirda 23 ming dollar evaziga Qoraqalpoq davlat universitetiga o‘qishga kiritib qo‘yishni va’da qilgan shaxs qo‘lga olindi.
Ma’lum qilinishicha, R.A. ismli shaxs fuqaro O‘.ni 23 ming dollar evaziga Berdaq nomidagi Qoraqalpoq davlat universitetining huquqshunoslik fakultetiga yoki 4 ming dollar evaziga jismoniy tarbiya fakultetiga o‘qishga kiritib qo‘yishga ishontirgan. Xizmati evaziga u oldindan 10 ming dollar va 40 million so‘mni olgan vaqtida ashyoviy dalillar bilan ushlangan.
Shuningdek, Departament hamda DXXning Beshariq tumani bo‘limlari tomonidan o‘tkazilgan tezkor tadbirda D.X. ismli shaxs fuqaro M.ni yuqori lavozimda ishlovchi tanishlari yordamida ming dollar evaziga Qo‘qon davlat pedagogika institutining psixologiya fakultetiga o‘qishga kiritib qo‘yishni va’da qilgan. Buning uchun u oldindan 500 dollarni olgan vaqtida ashyoviy dalillar bilan ushlangan.
Viloyatning Dang‘ara tumanida o‘tkazilgan tezkor tadbirda esa “B.S.” nodavlat ta’lim muassasasi rahbari fuqaro G.ning ishonchiga kirib, uni Qo‘qon pedagogika institutiga 2,5 ming dollar evaziga o‘qishga kiritib qo‘yishini aytib, oldindan 500 dollar olgan vaqtida qo‘lga olingan.
Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Toshkentda fuqaroning Qozog‘istondagi o‘qishini Samarqand tibbiyot institutiga ko‘chirib berish evaziga 5 ming dollar olgan shaxs ushlangani, Surxondaryoda talabalarni 5,4 million so‘mga chuv tushirib ketgan shaxsga nisbatan jinoiy ish qo‘zg‘atilgani, Toshkentda fuqaroni jismoniy tarbiya universitetiga o‘qishga kiritib qo‘yish uchun 7 ming dollar so‘ragan o‘qituvchi qo‘lga olingani hamda Surxondaryoda talabaning o‘qishini Qozog‘istondan O‘zbekistonga ko‘chirib berish uchun 15,6 million so‘m va 300 dollar so‘ragan shaxs ushlangani haqida xabar berilgandi.
Izoh (0)