Qashqadaryo viloyatining Kasbi tumanida faoliyat yurituvchi hokim To‘xtamurod Meyliyev bugungi kunda qaysi toifadagi rahbarlar matbuotdan qochishiga oydinlik kiritdi, deya xabar berdi “Daryo” muxbiri.
Ta’kidlanishicha, Kasbi tumani hokimi To‘xtamurod Meyliyev 2021-yilning 19-iyul kuni Qarshi shahridagi Jurnalistlar uyida jurnalist va blogerlar bilan muloqot qilib, ularni qiziqtirgan savollarga javob bergan.
“Bugungi kunda qaysi rahbar matbuotdan qochadi, qachonki o‘ziga bildirilgan ishonchni oqlamagan, ishlamagan rahbar bo‘lsa, u matbuotdan — jurnalist va blogerlardan qochadi. Ular bilan yuzma-yuz kelolmaydi”, — dedi tuman hokimi To‘xtamurod Meyliyev.
Kasbi tumani hokimi faoliyati davomida barcha jurnalist va blogerlar bilan hamkorlik qilishga tayyorligini aytib, har kuni ertalab barcha OAVda chiqqan xabarlarni imkon qadar kuzatib, qaysi soha yozilganini o‘qishini ma’lum qildi.
Hokim OAV vakillari bilan muloqoti davomida viloyatda hokimlik matbuot kotiblarining qay darajada erkin ekanligiga to‘xtalib, matbuot kotibi faoliyati haqida ham so‘zlab bergan.
“Matbuot kotib rahbarning soyasi bo‘lishi kerak. Bugungi kunda har xil axborot xurujlari bor. Ularga munosib javob berish uchun rahbar va matbuot kotibining fikri bir joydan chiqishi, ular maslahatlashgan holda ish ko‘rishi kerak. Shuningdek, matbuot kotibi rahbar bilan xohlagan vaqtida muloqotga kirishib, yuzaga kelgan muammo yuzasidan rahbar qarashini jamoatchilikka bildirishi lozim”, — dedi Kasbi tumani hokimi.
Hokimning qo‘shimcha qilishicha, u matbuot kotibiga barcha imkoniyatlarni yaratib bergan va erkin ishlashi uchun barcha huquqlarni ham bergan.
Mavzuga doir:
- “Axborot xizmati rahbarlarining uch-to‘rt nafari faol, qolganlari ham uyg‘onishi kerak”. Zoir Mirzayev tuman va shahar hokimlarining matbuot kotiblarini faollikka chaqirdi
- Faqat tilda o‘rinbosar maqomini olgan va ish boshlaganiga 5 oy ham bo‘lmagan matbuot kotiblari Qashqadaryo hokimi tanqidiga uchradi
Izoh (0)