Ukraina prezidenti Vladimir Zelenskiy 30-avgust kuni AQShga rasmiy tashrif bilan boradi va amerikalik hamkasbi Jo Bayden bilan uchrashadi. Bu haqda Oq uy matbuot kotibi Jen Psakiga tayanib “RBK” xabar berdi.
Foto: “TASS”
“Ushbu tashrif Donbass va Qrimda davom etayotgan Rossiya tajovuzi sharoitida AQSh Ukrainaning suvereniteti va hududiy yaxlitligini, shuningdek, energetik xavfsizlik bo‘yicha yaqin hamkorlikni doimiy ravishda qo‘llab-quvvatlashinining isboti bo‘ladi”, — dedi Psaki.
Uning so‘zlariga ko‘ra, muzokaralarda “Zelenskiyning korrupsiyaga qarshi kurashish va umumiy demokratik qadriyatlarga asoslangan islohotlar dasturini amalga oshirish borasidagi sa’y-harakatlari” Vashington tomonidan qo‘llab-quvvatlanishi muhokama qilinadi.
Iyun oyida Bayden Zelenskiyga AQShga kelishni taklif qilgandi. O‘shanda prezidentlar telefon orqali suhbatlashgan va suhbat davomida Amerika prezidenti ushbu taklifni bildirgan. Keyinchalik Ukraina tashqi ishlar vaziri Dmitriy Kuleba Zelenskiy va Bayden o‘rtasida uchrashuv iyul oyi oxiriga rejalashtirilganini aytdi.
Bunga qadar Kiyev Zelenskiyning Bayden bilan muzokaralarini AQSh prezidenti Rossiya prezidenti Vladimir Putin bilan 16-iyun kuni bo‘lib o‘tgan Jenevadagi sammitga borishidan oldin tashkil etishni rejalashtirgan edi. 7-iyun kuni Zelenskiyning o‘zi Axios’ga bergan intervyusida Bayden bilan Jenevadagi sammitdan oldin gaplashish niyatidaligini aytgan. Ukraina prezidenti Baydenning bandligini hisobga olgan holda bunday muzokaralar har qanday shaklda o‘tkazilishi mumkinligini ta’kidlagan, ammo uning shaxsiy fikriga ko‘ra, “bu kabi maslahatlashuvlar yuzma-yuz bo‘lib o‘tishi kerak, chunki ko‘p narsalarni telefon orqali muhokama qilib bo‘lmaydi”.
Zelenskiy 2019-yilda ham AQShga rasmiy tashrif bilan borgan. O‘shanda Ukraina prezidenti BMT Bosh assambleyasida so‘zga chiqqan. Sessiya doirasida Zelenskiy AQShning o‘sha paytdagi prezidenti Donald Tramp bilan muzokaralar o‘tkazishga muvaffaq bo‘lgan.
O‘sha yilning noyabr oyida Tramp Zelenskiyni Oq uyda mehmon qilishga tayyorligini birdirdi, biroq tashrif amalga oshmagan.
