Toshkent shahrida koronavirus infeksiyasi tarqalishi bilan bog‘liq vaziyat so‘nggi ikki oyda yaxshilangan, xususan, 1-iyul kuni poytaxtda so‘nggi bir oy ichidagi eng past kasallanish ko‘rsatkichi (99 kishi) qayd etildi. Buni Sog‘liqni saqlash vazirligi tomonidan yuritilayotgan O‘zbekistonda koronavirusning tarqalishiga doir rasmiy statistik ma’lumotlar ko‘rsatmoqda.
Doimiy o‘choqlar
Rasmiy statistikaga ko‘ra, Toshkent shahrida aprel oyida 5072 ta kasallanish holati ro‘yxatga olingan (30-aprelning o‘zida poytaxtda 259 kishida kasallik tasdiqlangan — taqqoslash uchun, 9-iyun kuni butun O‘zbekiston bo‘yicha 243 kishida koronavirus aniqlangan). May oyida Toshkentdagi kasallanish ko‘rsatkichi 4660 ni tashkil etgan (aprelga nisbatan 412 taga kam).
Iyun oyida esa Toshkent shahrida kasallanish ko‘rsatkichi may oyidagidan ham pastroq bo‘lgan — qayd etilgan 3968 ta holat maydagi ko‘rsatkichdan 692 taga, apreldagi “natija”dan esa 1104 taga (yoki salkam 23 foizga) kam. Toshkent viloyatida ham qariyb shunday holat — hududda iyundagi kasallanishlar soni maydagiga nisbatan 16,7 foizga kamaygan.
Shu bois Samarqand viloyati birinchi marta kasallanishlar soni bo‘yicha Toshkent viloyatini ortda qoldirib, ikkinchi o‘ringa ko‘tarildi (birinchi o‘rinda pandemiya boshidan beri Toshkent shahri turadi) — viloyatda iyunda 1328 holatda koronavirus tasdiqlangan. Bu maydagi “natija”dan 70 taga kam, biroq o‘sish sur’ati Toshkent viloyati bilan taqqoslaganda baribir yuqori.
Yangi o‘choqlar
SSVning 1-iyul va 2-iyul yakunlari bo‘yicha bergan hisobotlariga ko‘ra, Qoraqalpog‘iston Respublikasi (1-iyul — 47 ta), Andijon (2-iyul — 38 ta), Buxoro (2-iyul — 45 ta), Navoiy (2-iyul — 8 ta) va Sirdaryo (2-iyul — 23 ta) viloyatlarida koronavirus infeksiyasini yuqtirib olish bo‘yicha 2021-yil hisobidan mutlaq antirekordlar qayd etilgan. Iyunning ikkinchi yarmida Jizzax (30-iyun — 41 ta), Namangan (30-iyun — 43 ta), Samarqand (25-iyun — 90 ta), Surxondaryo (19-iyun — 74 ta), Farg‘ona (29-iyun — 60 ta), Xorazm (26-iyun — 49 ta), Toshkent (25-iyun — 94 ta) viloyatlarida yil antirekordlari o‘rnatilgan edi. Aynan shu antirekordlar sabab 2021-yilda birinchi marta O‘zbekistonda koronavirusga chalinganlar soni bir oyda 10 ming kishidan oshdi.
Iyun oyi yakunlari bo‘yicha xulosa qilinsa, eng og‘ir vaziyat Surxondaryo viloyatida yuzaga kelganini ko‘rish mumkin — viloyatda may oyida bor-yo‘g‘i 65 ta holatda koronavirus qayd etilgan bo‘lsa, iyun oyida 837 ta — may oyiga nisbatan 772 taga yoki 1187 foizga yoki salkam 13 barobarga ko‘p — kasallanish holati ro‘yxatga olingan. Taqqoslash uchun, 2021-yilning dastlabki besh oyida Surxondaryo viloyatida jami 230 ta (birgina iyundagi ko‘rsatkichdan 3,6 barobarga kam) holatda COVID-19 aniqlangan edi. “Daryo” manbalari, viloyatdagi mushtariylar bergan ma’lumotlarga ko‘ra, Surxondaryoda oilaviy kasallanish holatlari ko‘paygan, vafot etgan bemorlar ham oz emas.
Surxondaryodan tashqari Jizzax viloyatida (mayda — 156, iyunda — 518) kasallanish holatlari 3 martadan ko‘proqqa, Buxoro (mayda — 129, iyunda — 357) va Qashqadaryo (mayda — 134, iyunda — 342) viloyatlarida qariyb 3 martaga, Namangan (mayda — 154, iyunda 315) va Farg‘ona (mayda — 255, iyunda — 575) viloyatlarida esa deyarli 2 barobarga oshgan. Rasmiy statistika bo‘yicha iyun oyida kasallikka chalinish (may oyiga nisbatan) faqat Toshkent shahrida (14,8 foizga), Toshkent (16,7 foizga) va Samarqand (5,01 foizga) viloyatlarida kamaygan.
E’tiborga molik jihat — Jizzaxda 2021-yil yanvar—may oylarida koronavirus yuqtirib olish bilan bog‘liq jami 377 ta holat ro‘yxatga olingan bo‘lsa, iyunning o‘zida 518 ta holat qayd etilgan. Qashqadaryo (besh oyda — 233 ta, iyunda — 342 ta) va Farg‘ona (besh oyda — 462 ta, iyunda — 575 ta) viloyatlarida ham shu manzara. Qoraqalpog‘iston (besh oyda — 364 ta, iyunda — 274 ta), Buxoro (besh oyda —373 ta, iyunda —357 ta), Navoiy (besh oyda —169 ta, iyunda —103 ta), Namangan (besh oyda —370 ta, iyunda —315 ta) va Xorazmdagi (besh oyda — 438 ta, iyunda — 311 ta) ko‘rsatkichlar ham shunday ayanchli manzaraga yaqinroq, deyish mumkin.
Nimalar qilinmoqda?
Raqamlardan ko‘rinib turibdiki, Toshkentda aprel—may oylarida vaziyat og‘irroq edi, biroq respublika bo‘yicha vaziyat aynan may—iyun oylarida keskinlashgan (jamoatchilik fikricha, bu so‘nggi haftalarda hududlarda o‘tkazilgan festivallar va boshqa ommaviy tadbirlar bilan bog‘liq bo‘lishi mumkin). Shu bois 2020-yil bahorida joriy etilgan va shu vaqtgacha hali hech to‘liq bekor qilinmagan karantin 2021-yil 28-iyunidan nisbatan kuchaytirilishi, xususan, Toshkentga viloyatlardan kirish-chiqishda cheklovlar o‘rnatilishi e’lon qilindi (amalda bu choralarning faqat yemakxonalar faoliyatini 20:00 dan keyin cheklash qismi sezilarli ishlamoqda, xolos; Qashqadaryoda bu cheklov soat 22:00 gacha uzaytirilgan).Shuningdek, iyul oyidan boshlab Toshkent shahrida o‘tgan yil yozida tashkil etilgan, keyinchalik kasallanish holatlari kamaygach, konservatsiya qilingan vaqtinchalik kovid-markazlar faoliyati qayta tiklana boshladi. Ayrim viloyatlarda iyun oxiri — iyul oyi boshida kasallanish bo‘yicha yangi antirekordlar qayd etilayotgani e’tiborga olinsa, yaqin vaqt ichida viloyatlarda ham vaqtinchalik kovid-markazlar faoliyati qayta tiklanishi, ayrim hududlarda (ehtimol, respublika bo‘yicha) karantin choralarini nisbatan qat’iylashtirish, belgilangan talablarga rioya etilishi ustidan nazoratni yanada kuchaytirish bo‘yicha navbatdagi qarorlar chiqarilishi mumkinligini taxmin qilish mumkin.
Izoh (0)