Shvetsiya bosh vaziri iste’foga chiqdi. Unga ishonchsizlik votumi e’lon qilingandi

Shvetsiya bosh vaziri Stefan Lyoven parlament raisiga iste’foga chiqish to‘g‘risida ariza topshirdi. Bosh vazir o‘tgan hafta parlamentdan ishonchsizlik votumi olganidan so‘ng shunday qarorga keldi, deb yozadi “RBK”.

Mahalliy qonunchilikka muvofiq, Lyovenga o‘z rahbarligi ostida yangi hukumat koalitsiyasini tuzish uchun tun yarmigacha (28-iyun) vaqt berilgandi. Ammo oxir-oqibat sotsial-demokratlar yetakchisi bo‘lgan Lyoven markazchi partiyalar bilan kelisha olmadi.

Shvetsiya parlamenti 1958-yildan buyon birinchi marta hukumat rahbariga ishonchsizlik votumi e’lon qilgandi. Agar parlament a’zolari mamlakat bosh vaziriga ishonchsizlik bildirsa, hukumat iste’foga chiqishi yoki qo‘shimcha saylov tayinlashi kerak.

Lyovenga ishonchsizlik bildirish masalasini “Shvetsiya demokratlari” partiyasi ovozga qo‘ydi. Bunga uy egalariga turar joy uchun ijara haqini erkin belgilashga imkon beradigan yangi qonun loyihasi sabab bo‘ldi. Bosh vazir ushbu qonun loyihasini ilgari surgan. Mahalliy The Local nashrining aniqlik kiritishicha, mamlakatda ijaraga berishning qat’iy qoidalari mavjud bo‘lib, ulardan biri shundan iboratki, uy egalari ijaraga beradigan turar joyi narxini mustaqil belgilay olmaydi, aksincha, faqat “o‘rtacha ijara haqi” olishi mumkin.

Bunday qoidani bekor qilish taklifi parlamentdagi so‘lchilar orasida Shvetsiya ijtimoiy modeliga zid va ijarachilarga tahdid sifatida qabul qilindi.

Lyoven 2018-yilda Shvetsiya hukumati rahbari sifatida ish boshlagan. Vazirlar Mahkamasi tuzilishidan oldin to‘rt oylik muzokaralar bo‘lib o‘tgan. Natijada, sotsial-demokratlar va “yashillar” partiyasining koalitsiyasi liberallar va so‘l partiyalar bilan yangi kabinet ishiga aralashmaslik to‘g‘risidagi kelishuv tufayligina ma’qullandi. Iyul boshida so‘l partiya kelishuvlardan chiqishga qaror qilganidan keyin vaziyat o‘zgardi.

Reuters suhbatdoshlarining fikriga ko‘ra, hozirgi siyosiy inqiroz uzoq davom etishi mumkin: so‘rovlar shuni ko‘rsatadiki, so‘lchilarda ham, o‘ngchilarda ham hukumat tuzish ehtimoli deyarli teng, shu sababli tez orada yangi koalitsiya tuzilishiga kafolat yo‘q.