Toshkentda taekvondo bo‘yicha O‘zbekiston termasi murabbiyi Janubiy Koreya fuqarosi tomonidan pichoqlab o‘ldirildi

Toshkent shahar IIBB ijtimoiy tarmoqlarda poytaxtda xorijlik ikki fuqaro o‘rtasida yuz bergan mojaro o‘lim bilan yakunlangani to‘g‘risida tarqalgan xabar yuzasidan ma’lumot berdi.

Ma’lum qilinishicha, 15-may kuni soat 04:00 larda Chilonzor tumanida Janubiy Koreya fuqarosi bo‘lgan 44 yoshli K.D. mast holatda yuzaga kelgan tortishuv oqibatida 39 yoshli tanishiga pichoq bilan og‘ir tan jarohati yetkazgan. Taekvondo WTF assotsiatsiyasi murabbiyi bo‘lgan koreyalik jabrlanuvchi shifoxonaga yetkazilgan. Biroq ko‘rsatilgan tez tibbiy yordamga qaramay, u ertasi kuni shifoxonada vafot etgan.

Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 104-modda (qasddan badanga og‘ir shikast yetkazish) 3-qismi “d” bandi bilan jinoyat ishi qo‘zg‘atilgan. Gumonlanuvchi erkak qo‘lga olingan, dastlabki tergov harakatlari olib borilmoqda.

UzNews nashrining yozishicha, Kim Jin Yung 1980-yilda tug‘ilgan. Sport faoliyatida taekvondoning WTF yo‘nalishi bo‘yicha Janubiy Koreyada bir necha bor chempion bo‘lgan. 2019-yildan O‘zbekiston terma jamoasida ishlab kelagan. Kim Jin Yung taekvondo WTF bo‘yicha 6-dan qora belbog‘ sohibi. Shuningdek, xalqaro toifadagi hakam va litsenziyadan o‘tgan instruktor hisoblanadi.

Avvalroq Xorazmda qaynakasini pichoqlab o‘ldirgan 27 yoshli shaxs 11 yilga ozodlikdan mahrum etilgani, Namanganda erini bolta bilan urib o‘ldirgan ayol 10 yilga qamalgani, Samarqandda yigit 50 yoshli tanishini mix bilan o‘ldirgani to‘g‘risida xabar berilgandi.