Тошкент шаҳар ИИББ ижтимоий тармоқларда пойтахтда хорижлик икки фуқаро ўртасида юз берган можаро ўлим билан якунлангани тўғрисида тарқалган хабар юзасидан маълумот берди.
Маълум қилинишича, 15 май куни соат 04:00 ларда Чилонзор туманида Жанубий Корея фуқароси бўлган 44 ёшли К.Д. маст ҳолатда юзага келган тортишув оқибатида 39 ёшли танишига пичоқ билан оғир тан жароҳати етказган. Таэквондо WTF ассоциацияси мураббийи бўлган кореялик жабрланувчи шифохонага етказилган. Бироқ кўрсатилган тез тиббий ёрдамга қарамай, у эртаси куни шифохонада вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 104-модда (қасддан баданга оғир шикаст етказиш) 3-қисми «д» банди билан жиноят иши қўзғатилган. Гумонланувчи эркак қўлга олинган, дастлабки тергов ҳаракатлари олиб борилмоқда.
UzNews нашрининг ёзишича, Ким Жин Юнг 1980 йилда туғилган. Спорт фаолиятида таэквондонинг WTF йўналиши бўйича Жанубий Кореяда бир неча бор чемпион бўлган. 2019 йилдан Ўзбекистон терма жамоасида ишлаб келаган. Ким Жин Юнг таэквондо WTF бўйича 6-дан қора белбоғ соҳиби. Шунингдек, халқаро тоифадаги ҳакам ва лицензиядан ўтган инструктор ҳисобланади.
Аввалроқ Хоразмда қайнакасини пичоқлаб ўлдирган 27 ёшли шахс 11 йилга озодликдан маҳрум этилгани, Наманганда эрини болта билан уриб ўлдирган аёл 10 йилга қамалгани, Самарқандда йигит 50 ёшли танишини мих билан ўлдиргани тўғрисида хабар берилганди.
Изоҳ (0)