Qarshi shahrida maktabgacha ta’lim bo‘limi boshlig‘i va 10 nafar xodimi koronavirusga chalindi. Bu haqda “Daryo”ga viloyat Maktabgacha ta’lim boshqarmasi axborot xizmati rahbari Bahodir Musayev xabar berdi.
Qayd etilishicha, Qarshi shahar maktabgacha ta’lim bo‘limi mudiri vazifasini vaqtincha bajaruvchi Z.B. hamda 10 nafar bo‘lim xodimi koronavirusga qarshi davolanmoqda. Ayni kunda ularning ahvoli o‘rtacha. Bemorlarning besh nafari uy sharoitida, olti nafari esa shifoxonada muolajalarni davom ettirmoqda.“Holat yuzasidan tezkor ehtiyot choralari ko‘rildi hamda to‘liq nazoratga olingan”, — deydi Bahodir Musayev.
Qo‘shimcha qilinishicha, Qarshi shahridagi mavjud maktabgacha ta’lim tashkiloti xodimlari hamda tarbiyalanuvchilar orasida koronavirusga chalinish holatlari kuzatilmagan.
“Maktabgacha ta’lim tashkilotlarida sanitariya qoidalari hamda karantin qoidalariga qat’iy rioya etish borasida tegishli choralar belgilandi”, — deydi boshqarma axborot xizmati rahbari.
Qarshi davlat universiteti axborot xizmatining rasmiy kanalida ma’lum qilinishicha, universitet talabasi J.D. 2021-yil 15-iyun kuni shifoxonaga murojaat qilib, test topshirgan. Tahlillar unda koronavirus kasalligi borligini ko‘rsatgan.
“Kasallik dastlab 13-iyun kuni ukasida aniqlangan. Ayni damda davolanishda bo‘lgan talabaning ahvoli yaxshi. Universitet ma’muriyati tomonidan doimiy xabar olinmoqda. 15-iyun kuni talaba bilan birga o‘qiydigan kursdoshlaridan test olingan va ularda kasallik belgilari qayd etilmagan. Shuningdek, universitetda belgilangan jadval asosida yakuniy nazoratlar karantin qoidalariga qat’iy rioya qilingan holda tashkil etib kelinmoqda”, — deyiladi OTM axborotida.
Avvalroq O‘zbekistonda 17-iyun kuni yana 385 kishida koronavirus tasdiqlanib, mamlakatda ushbu virusga chalingani rasman tan olinganlar soni 105 219 nafarga yetgani xabar qilingan edi.
Izoh (0)