Motorola Britaniyaning himoyalangan telefonlar ishlab chiqarish bilan shug‘ullanuvchi Bullitt Group kompaniyasi bilan bitim imzolagan bo‘lib, 17-iyun kuni ushbu hamkorlikning ilk natijasi Motorola Defy (2021) nomi ostida taqdim etildi, deb xabar beradi IXBT.

Foto: IXBT

Motorola Defy smartfoni HD+ sifatni qo‘llab-quvvatlaydigan 6,5 dyuymli displey bilan jihozlangan bo‘lib, u Corning Gorilla Glass Victus oynasi bilan himoyalangan. Frontal qismida 8 megapikselli selfi kamera uchun tomchisimon qirqim mavjud. Telefon mustahkam plastik korpusga ega, suv va changdan IP68 standarti bo‘yicha himoyalangan. Shuningdek, Motorola’ning ma’lum qilishicha, Defy modeli Selsiy bo‘yicha -25 darajadan +55 darajada ishlay oladi. Yangi Motorola Defy 1,8 metr balandlikdan tushib ketishga ham bardoshli.

Smartfonning asosiy kamerasi 48 megapikselni tashkil etib, unga qo‘shimcha ravishda makro suratga olishlar va chuqurlikni o‘lchash uchun 2 megapikselli kameralar o‘rnatilgan. Smartfon bir kristalli Snapdragon 662 tizimi bazasida yaratilgan, tezkor xotirasi 4 gigabaytni, ichki xotirasi esa 64 gigabaytni tashkil etadi. Akkumulyator sig‘imi 5000 mA/soat va 20 vattli tezkor quvvatlanish funksiyasiga ega. Qurilma Android 11 operatsion tizimida ishlaydi, shuningdek, unga 3,5 millimetrli razyom va USB-C o‘rnatilgan.

Foto: IXBT

Motorola Defy keyingi haftada Yevropa bozorlarida 325 dollar qiymatida sotuvga chiqadi.

Avvalroq yechiladigan akkumulyatorga ega “o‘lmaydigan” smartfon — Samsung Galaxy XCover5 taqdim etilgani to‘g‘risida xabar berilgandi.