Shavkat Mirziyoyev 17–18-iyun kunlari Andijon viloyatiga tashrif buyurishi rejalashtirilgan. Bu haqda Prezident matbuot kotibi Sherzod Asadov tomonidan o‘tkazilayotgan brifingda ma’lum qilindi, deya xabar bermoqda “Daryo” muxbiri Mirolim Isajonov.

Foto: “Daryo” / Madina Nurman

Shuningdek, Asadov, ushbu haftada ham Prezidentning kun tartibi tig‘iz bo‘lishini ta’kidlagan.

Jumladan, bugun, 14-iyun kuni sog‘liqni saqlash sohasiga oid masalalar va takliflar (birinchi navbatda onkologiya va gematologiya yo‘nalishlariga oid), hamda Toshket viloyatining Tatariston bilan hamkorligi yuzasidan taqdimotlar, 15-iyun kuni oliy ta’lim sohasidagi islohotlar va joriy yilgi qabul jarayoniga tayyorgarlik bo‘yicha videoselektor o‘tkazilishi belgilangan.

Seshanba kuni davlat rahbarining Birlashgan Arab Amirliklari hukumat ishlari bo‘yicha vaziri Al-Gergavi, 16-iyun kuni esa Tatariston prezidenti Rustam Minnixanov bilan uchrashuvlari ham reja qilingan.

Eslatib o‘tamiz, Shavkat Mirziyoyev 1–2-iyun kunlari Surxondaryo viloyati, 10—11-iyun kunlari Tojikistonda rasmiy tashrif bilan bo‘ldi.

Ma’lumot uchun, O‘zbekiston Prezidenti so‘nggi marta Andijon viloyatiga 2020-yilning may oyida tashrif buyurgan.