Parrandachilik korxonalari uchun foyda, mol-mulk, yer va suv soliqlari stavkalari 50 foizga kamaytiriladi. Bu haqda Prezident Shavkat Mirziyoyev raisligida 8-iyun, seshanba kuni o‘tkazilgan yig‘ilishda davlat rahbari so‘z yuritdi, deya xabar bermoqda “Daryo” muxbiri.

Foto: “Daryo” / Madina Nurman

“Parrandachilik sohasida 1,1 mingta korxonalarning quvvati 50 foizga ham ishlatilmayapti. Vaholanki, bu borada imkoniyatlar yetarli.

Birgina misol, “Jomboy naslli parranda” korxonasida ozuqa-yem ishlab chiqarish, inkubatsion sex, parranda kushxonasini tashkil etib, tuxum tannarxining 25 foiz arzon bo‘lishiga erishgan. Shuningdek, korxona kooperatsiya usulida 40 ta xonadonning har biriga 5 mingtadan jo‘ja va ozuqa tarqatib, veterinariya xizmatini hamda mahsulotni sotib olishni yo‘lga qo‘ygan.

Endi, parranda sanoatini qo‘llab-quvvatlash bo‘yicha yangi mexanizmlar joriy etiladi. 1-iyuldan berilishi kerak bo‘lgan subsidiya miqdori tuxum uchun 3 baravar (har bir sotilgan tuxumga 150 so‘m), parranda go‘shti uchun esa 2 baravar (har bir kilogrammiga 1,5 ming so‘m) oshirilib, to‘lovlar 1-iyundan boshlanadi.

Omixta yem va parrandachilik mahsulotlari ishlab chiqaruvchilarga aylanma mablag‘ni to‘ldirish va parrandachilik loyihalari uchun kreditlarning Markaziy bank asosiy stavkasidan yuqori qismi qoplab beriladi.

Parrandalarni so‘yishga mo‘ljallangan zamonaviy kompleks loyihalari bo‘yicha xarajatlarning bir qismi kompensatsiya qilinadi. Parrandachilik korxonalari uchun foyda, mol-mulk, yer va suv soliqlari stavkalari 50 foizga kamaytiriladi.

Qo‘chqorov, G‘ulomov, G‘aniyev, Mavlonov bir hafta muddatda ushbu yangi mexanizmlarni joriy qilish bo‘yicha qaror loyihasini kiritsin.

Viloyat, tuman va shahar hokimlari yangi loyihalar ortidan quvmasdan, ikki hafta muddatda mavjud korxonalarni yil yakuniga qadar to‘liq quvvatlarga chiqishini ta’minlash bo‘yicha dasturlarni tasdiqlasin”, — dedi Shavkat Mirziyoyev.