AQShning Yuta shtatidagi Uest-Jordan shahrida to‘rt va to‘qqiz yoshli qizlar okeanda delfinlar bilan suzishga borish uchun ota-onasining Chevrolet Malibu’sini minib qochdi, deb xabar beradi Motor.

Foto: ABC4 Utah

Uest-Jordan shahrida tungi soat 03:00 larda noodatiy yo‘l-transport hodisasi sodir bo‘lgan: Chevrolet Malibu sedani Volvo yuk mashinasiga borib urilgan. Yuk mashinasi haydovchisining chaqirig‘i bo‘yicha voqea joyiga yetib kelgan politsiya patruli yengil avtomobil rulida to‘qqiz yoshli qizcha, yo‘lovchi o‘rindig‘ida esa to‘rt yoshli singlisi o‘tirganidan hayratga tushgan.

Avariya oqibatida hech kimga shikast yetmagan — mashina yaxshigina pachoqlanganiga qaramay, qizaloqlar xavfsizlik kamarini taqqan bo‘lgan. Opa-singil yuk mashinasiga urilishdan oldin, yana bir avtomobilni turtib o‘tishga ulgurgan. Aniqlanishicha, bolalar ota-onasi uxlab yotganida, yashirincha mashina kalitini olib, yo‘lga otlangan.

Qizlar shunchaki tungi shaharni aylanish niyatida bo‘lmagan — ular Kaliforniya shtatidagi Tinch okeanigacha borib, u yerda delfinlar bilan suzish borasidagi aniq reja ishlab chiqqan. Shu bilan birga, ularni Uest-Jordondan Kaliforniya qirg‘oqlariga qadar bo‘lgan masofa salkam 1250 kilometr ekani qiziqtirmagan ham. Natijada tunggi safar 16 kilometrgina davom etgan. Bu vaqtda uxlab yotgan opa-singilning ota-onasi yaqinda Kaliforniyaga borish haqida gaplashishganini tan olgan.

Avvalroq amerikalik 11 yoshli o‘quvchi maktab avtobusini haydab qochgani va politsiyachilar uni yarim soat quvlagani, 5 yoshli bola ota-onasining mashinasini haydab chiqib, o‘ziga Lamborghini xarid qilishga yo‘l olgani, Lamborghini olish uchun ota-onasining mashinasini haydab ko‘chaga chiqqan 5 yoshli bolani superkarda sayr qildirishgani to‘g‘risida xabar berilgandi.