O‘zbekistonda 15-aprel Madaniyat va san’at xodimlari kuni sifatida belgilanishi kutilmoqda

Oliy Majlis Senatining 29-mayda o‘tkazilgan o‘n beshinchi yalpi majlisida “O‘zbekiston Respublikasi madaniyat va san’at xodimlari kunini belgilash to‘g‘risida”gi qonun muhokama etildi. Bu haqda Senat matbuot xizmati xabar berdi.

Eslatib o‘tamiz, Shavkat Mirziyoyev 2020-yil 26 may kuni madaniyat va san’at sohasining jamiyat hayotidagi o‘rni va ta’sirini yanada oshirish bo‘yicha farmonni imzolagandi. Farmonda Prezident 15-aprelni “O‘zbekiston Respublikasi madaniyat va san’at xodimlari kuni” deb e’lon qilish taklifini ma’qullangan.

Senat xabarida aytilishicha, Madaniyat vazirligi, “O‘zbekkino” milliy agentligi, O‘zbekiston badiiy akademiyasi, Yozuvchilar uyushmasi, O‘zbekiston kompozitorlari va bastakorlari uyushmasi, O‘zbekiston teatr arboblari uyushmasi, Respublika ma’naviyat va ma’rifat markazi hamda keng jamoatchilikning takliflarini hisobga olib, madaniyat va san’atning jamiyatimiz ijtimoiy-ma’naviy hayotida tutgan o‘rnini hisobga olib, soha xodimlarini qo‘llab-quvvatlash maqsadida qonun bilan 15-aprel O‘zbekiston madaniyat va san’at xodimlari kuni sifatida belgilanmoqda.

Ayna paytda dunyoning ko‘plab davlatlarida ushbu sana Xalqaro madaniyat kuni sifatida nishonlanadi. Xususan, 2008-yildan Italiya, Ispaniya, Rossiya, Argentina, Meksika, Kuba, Latviya va Litva kabi davlatlarda 15-aprel — Xalqaro madaniyat kuni Tinchlik bayrog‘i ostida nishonlanadi.

O‘zbekiston madaniyat vaziri Ozodbek Nazarbekov shu kunga qadar O‘zbekistonda barcha soha vakillari uchun kasb bayrami kunlari belgilangani, ammo xalqaro miqyosda 15-aprel — Madaniyat va san’at xodimlari kuni sifatida nishonlansa-da, O‘zbekistonda rasman qayd etilmaganini aytgandi.

Uning ta’kidlashicha, 15-aprel sanasini O‘zbekiston Respublikasi madaniyat va san’at xodimlari kuni deb e’lon qilish mazkur sohada faoliyat yuritayotgan rahbar xodimlardan tortib, har bir ijodiy va texnik xodimlarning kasb bayrami sifatida ushbu kunni nishonlashi ularning ishchanlikni, fidoyiligi, ijodda sermahsulligini yanada oshiradi.

Qonun bilan, shuningdek, O‘zbekistonda madaniyat va san’at sohasini rivojlantirish, o‘zbek milliy madaniyati va san’ati nufuzini jahon miqyosida oshirish, yosh iste’dod egalarining qobiliyati va salohiyatini ro‘yobga chiqarish borasida fidokorona mehnat qilgan va yuqori natijalarga erishgan fuqarolarni aynan mana shu bayram kunida “Madaniyat va san’at fidokori” ko‘krak nishoni bilan taqdirlanishi ko‘zda tutilgan.

Qonun yuzasidan Senatning tegishli qarori qabul qilindi.