Taniqli musiqachilar Ed Shiran, Xolzi, Benni Blanko va Xalid plagiatda ayblanmoqda, deb xabar beradi Esquire.
Foto: Legion Media
Gap Xolsi, Xalid va Blankoning Eastside nomli xiti haqida ketmoqda. Shiran ushbu qo‘shiq muallifi sifatida tilga olingan. Trek 2018-yilda chiqqan va tez orada ommalashib, Billboard Hot 100’ning dastlabki o‘ntalik pog‘onasidan o‘rin olgan.
Oradan uch yil o‘tgach, Shiran, Xolzi, Benni Blanko va Xalid mualliflik huquqini buzishda ayblanmoqda, Loveless qo‘shig‘ining yaratuvchilari ularni sudga bergan.
U qadar mashhur bo‘lmagan American XO guruhining Loveless qo‘shig‘i 2015-yilda chiqqan, qo‘shiqni bastakorlar Kostantin Lois hamda Sheyn Uilyams yozgan. Da’vogarlarning so‘zlariga ko‘ra, Loveless va Eastside’ning gitara akkordlari, intervallari, temp va bitlari o‘xshash. Quyidagi videolar orqali ularni taqqoslab ko‘rish mumkin:
Eastside
Loveless
Shuningdek, kompozitorlar Blanko ilhomlanish uchun kuniga 10-12 ta yangi musiqa tinglashi borasidagi intervyusini ham keltirib o‘tgan. Da’vogarlarning hisoblashicha, reper ularning qo‘shig‘ini tinglab, undan foydalangan. Ularning fikricha, treklar o‘rtasidagi o‘xshashlik kundek ravshan.
Ed Shiranning bu kabi ayblovlarga duch kelishi birinchi bor emas. 2018-yilda u Marvin Gey ijrosidagi Let’s Get In On qo‘shig‘ining ayrim elementlari plagiatida ayblangan edi.
